«Ҳеч ким билмайди». Германия канцлери Россиянинг Украинадаги операцияси қанча давом этиши мумкинлиги ҳақида фикр билдирди

Россиянинг Украинадаги махсус операцияси қанча давом этишини ҳеч ким билмайди, аммо Россия ҳукумати уни олиб бориш учун жуда катта ресурсларга эга. Бу ҳақда Германия канцлери Олаф Шольц маълум қилди, деб ёзади «РБК».

Канцлердан Россия операцияси «йиллаб» давом этиши мумкинми? — деб сўрашди. «Аслида буни ҳеч ким билмайди», — дея жавоб берди Шольц.

«У [Россия президенти Владимир Путин] — кўп одамлар яшайдиган, ресурслари катта бўлган жуда буюк мамлакат етакчиси, шундай экан, у ҳақиқатан ҳам узоқ вақт давом эттириши мумкин», — дея қўшиб қўйди Германия канцлери.

Шунингдек, интервью чоғида Шольцдан Владимир Путин «Украинада қўним топади» деб ишонасизми? — деб сўрашди. «Ўйлайманки, биз қилаётган ҳамма нарсалар унга бу иш бермаслиги ва у муваффақиятга эриша олмаслигини тушунишда ёрдам беради», — деди канцлер бунга жавобан.

Март бошида Россия мудофаа вазири Сергей Шойгу Украинадаги операция белгиланган мақсадларга эришилгунига қадар давом этишини таъкидлаганди. 24 февраль куни операция бошланганини эълон қилаётиб, Путин унинг мақсадлари Украинани «демилитаризация ва денацификация қилиш» (қуролсизлантириш ва нацизмга қарши курашиш), шунингдек, Донбасс аҳолисини, гўёки Киев ҳукумати томонидан олиб борилаётган, «геноцид»дан ҳимоя қилиш эканини айтганди.

Апрель бошида Россия президенти вакили Дмитрий Песков операция «яқин келажакда» якунланишига умид билдирганди.

Украина президенти Владимир Зеленский, ўз навбатида, низо йил охиригача, қиш бошлангунича тугайди, деб умид қиляпти. Кремль агар Киев ҳарбийларига қуролларни тушириш буйруғини бериб, Москванинг шартларини бажарса, жанговар ҳаракатлар бир кундаёқ тугашига эришиши мумкинлигини маълум қилди.