Украина қуролли кучлари ҳарбийлар жонини сақлаб қолиш учун Лисичанскдан чекинган, дея маълум қилди Украина президенти Владимир Зеленский ўз видеомурожаатида. Шу билан бирга, у Украина кучлари кейинроқ шаҳарга қайтишига ваъда берди, деб ёзади «РБК».
«Биз жангчиларимиз, одамларимиз ҳаётларини асраяпмиз. Деворларни қураверамиз, ерларимизни жанг билан қайтариб олаверамиз, лекин энг муҳими, одамларни асрашимиз керак. Ва агар армиямиз қўмондонлиги фронтнинг душман ўт очиш бўйича устунликка эга бўлган маълум бир нуқталаридан, хусусан, Лисичанскдан одамларни олиб кетдими, бу фақат битта нарсани билдиради — биз тактикамиз, замонавий қуроллар етказиб берилишини кучайтириш шарофати билан қайтиб борамиз», — дея таъкидлади президент.
Шунингдек, у Украина «ҳеч нарсани бериб қўймайди», деб ишонтирди.
Бундан аввал, 3 июль, якшанба куни Украина қуролли кучлари Бош штаби Лисичанскдан қўшинларни олиб кетиш қарори Россия билан кучлар тенгсизлигидан келиб чиқиб қабул қилинганига аниқлик киритганди. «Шаҳар мудофаасини давом эттириш ҳалокатли оқибатларга олиб келган бўларди. Украиналик ҳимоячилар ҳаётларини сақлаб қолиш учун кетишга қарор қилинди», — дейишганди.
Лисичанск тўлиқ қуршовга олингани ҳақида Россия Мудофаа вазирлиги 3 июль куни хабар берди. Идора, шунингдек, шаҳарда жанглар бораётганини маълум қилди.
Ундан бир кун олдинроқ Чеченистон раҳбари Рамзан Қодиров Россия кучлари ва ЛХР ҳарбийлари Лисичанск марказида эканини қайд этганди. Унинг сўзларига кўра, улар шаҳарни Украина кучларидан «тозалаган». Кечки пайт Қодиров Лисичанск Россия кучлари назорати остига ўтганини маълум қилди.
Зеленский эса Лисичанск россиялик ҳарбийлар назоратига олингани ҳақида гапиришга ҳали эрталигини, чунки шаҳар ташқарисида жанглар бораётганини айтганди.
Лисичанск Украинанинг Луганск вилояти ҳудудида ЛХР назорат ўрнатишга уринаётган сўнгги йирик шаҳар бўлиб қолаётган эди. 3 июль, якшанба куни Мудофаа вазирлиги вазир Сергей Шойгу президент Владимир Путинга ЛХРнинг «озод этилгани»ни етказгани хабар берилди.
Изоҳ (0)