Бугун, 4 июль куни эрталабдан Франция бош вазири Элизабет Борннинг аввалги ҳукуматидаги вазирлар алмаштирила бошлагани ҳақида хабарлар келди, деб ёзади «Коммерсантъ». Кечки пайт янгиланган вазирлар маҳкамаси мажлисга йиғилиши эълон қилинди.
Вазирларни ўзгартириш президент Эммануэль Макронга ҳукуматни парламент сайловларидан кейин юзага келган янги шароитларга мослаштириш учун керак бўлди.
1922 йилдан буён биринчи марта бош вазир ҳукуматга мутлақ кўпчиликсиз раҳбарлик қилмоқда. Бу Элизабет Борнга бир талай муаммоларни келтириб чиқариши мумкин, уларнинг биринчиси ишончсизлик вотуми бўйича овоз беришнинг ўтказилиши бўлиши мумкин, буни парламентдаги сўллар талаб қилмоқда. Уларни тўхтатиб бўлмайди. Ўтган ҳафта парламент гуруҳлари шаклланганидан кейин Эммануэль Макрон бор-йўғи 250 та овозга умид қилиши мумкин, мутлақ кўпчилик учун эса унга 289 та овоз керак.
Ҳукуматдаги ўрнидан парламентга сайловларда мағлуб бўлган вазирлар айрилади. Ҳукуматнинг тўлиқ таркиби куннинг иккинчи ярмида маълум бўлади.
Эслатиб ўтамиз, Франция президенти Эммануэль Макроннинг «Биргаликда!» коалицияси мамлакат парламентининг қуйи палатаси — Миллий мажлисга бўлиб ўтган сайловларнинг иккинчи босқичида ғолиб бўлди, бироқ мутлақ кўпчилик ўринни қўлга кирита олмади. У 577 та ўриндан 245 тасини эгаллади, кўпчилик ўринга эга бўлиш учун унга 40 дан ортиқ жой етмай қолди.
Франция бош вазири Элизабет Борн овоз бериш якунларини изоҳлар экан, уларни мисли кўрилмаган ҳолат деб атади. «Бу вазият мамлакатимиз учун хавф бўлиб ҳисобланади, чунки ҳам миллий, ҳам халқаро даражада тўқнашишимизга тўғри келадиган муаммоларни келтириб чиқаради», — деди у.
Ислоҳотлар ўтказиш учун Макрон ўз коалициясидан ташқаридаги депутатлардан кўмак олишига тўғри келади, бироқ баъзи партиялар аллақачон давлат раҳбарига ёрдам беришни истамаслигини билдирган. Масалан, республикачилар вакиллари Макронга нисбатан мухолифат йўналишида муносабатни сақлаб қолишини эълон қилди.
Изоҳ (0)