Ўзбекистон мерганлари халқаро мусобақада Германия, Қатар, Озарбайжонни ортда қолдириб, иккинчи ўринни эгаллади

Туркиянинг Эгридир шаҳридаги «Командо» ўқув маркази базасида етакчи давлатларнинг ҳарбий хизматчилари ўртасида «Энг илғор мерганлар жамоаси» номли халқаро мусобақа ўтказилди. Бу ҳақда Ўзбекистон Мудофаа вазирлиги матбуот хизмати «Дарё»га маълум қилди.

Маълум қилинишича, мусобақа Германия, Баҳрайн, Қатар, Озарбайжон каби дунёнинг 12 давлатидан жами 33 та жамоа, Туркиянинг ўзидан эса денгиз махсус кучлари, қуруқликдаги махсус кучлари, махсус операциялар кучлари каби алоҳида қўшин турларидан жами 15 та жамоа иштирок этган.

Кундузги ва тунги машғулотларни ўз ичига олган мусобақа беллашувлари ўн кун давомида ўтказилган. Ушбу халқаро мусобақанинг бошқа мерганлик мусобақаларидан фарқи шундаки, унда вертолёт ва қайиқда ҳам харакат вақтида отиш машқлари бажарилган.

Шунингдек, мусобақанинг ҳеч бир босқичида лазерли масофа ўлчагичлардан фойдаланишга рухсат берилмаган, мерганлар 1000 метр ва ундан ортиқ масофада бўлган нишонни оптик мосламалар ёрдамида аниқлаб, белгиланган вақт орасида уни яксон қилган.

Бундан ташқари, мусобақа иштирокчилари тунгги вақтда магнит азимути бўйича тоғли ҳудудда 6 соат давомида ҳаракатланиб, ноаниқ масофадаги нишонни яксон этган.

«Ўзбекистон Мудофаа вазирлиги жамоаси вакиллари учун мусобақа ўтказилган ҳудуд буткул нотаниш, нишонлар ва машқлар ҳақида тўлиқ маълумотлар бўлмасада, ҳарбий хизматчиларимиз барча шартларни муваффақиятли бажариб, 12 та давлат жамоалари орасида фахрли иккинчи ўринни қўлга киритишган. Биринчи ўрин мезбон давлат вакилларига насиб этган», — дейилади хабарда.

Бундан олдин, ўзбекистонлик ҳарбийлар Британияда ўтказилган «Кембрия патрули» мусобақасида 2-ўринни эгаллагани, Ўзбекистон жамоаси «АрМИ-2021» халқаро армия ўйинлари якуни бўйича умумжамоа ҳисобида 2-ўринни эгаллагани тўғрисида хабар берилганди.