Адлия вазири Русланбек Давлетов «снос»ларга барҳам берадиган муҳим қонун президент томонидан имзоланганини маълум қилди.
«Яқинда Президентимиз Шавкат Мирзиёев ‘снос’ муаммосига эътибор қаратар экан, бундай ҳолатга бутунлай барҳам бериш учун уй-жой бўйича конституциявий кафолатни белгилаб қўйиш лозим деган эди.
Ушбу конституциявий кафолатнинг ҳуқуқий асосини миридан сиригача белгилаб берадиган қонун давлат раҳбари томонидан имзоланди.
Узоқ давом этган баҳс-мунозаралардан сўнг демократик жараёнлар чиғириғидан муваффақиятли ўтган «Ер участкаларини компенсасия эвазига жамоат эҳтиёжлари учун олиб қўйиш тартиб-таомиллари тўғрисида»ги қонун халқимизни бир неча йилдан буён қийнаб келган муаммоларга барҳам беришига ишонамиз», деб ёзди Адлия вазири ўзининг Facebook’даги саҳифасида.
Қонунга кўра, ер участкаларини жамоат эҳтиёжлари учун олиб қўйилишига асос бўладиган мақсадларнинг тугал рўйхати тасдиқланмоқда. Энди қонунда белгиланган ҳақиқатан ҳам жамоат эҳтиёжи бўлган 6 та мақсаддан бошқа ҳар қандай ҳолатларда ер участкаларини олиб қўйишни жамоат эҳтиёжлари учун деб баҳолаш тақиқланди.
«Қонуннинг яна бир ютуғи шундаки, ер участкаси жамоат эҳтиёжларини амалга ошириш учун бошқа чора бўлмаганда – энг сўнгги чора сифатидагина олиб қўйилиши мумкин. Энг муҳими ташаббускор ер учаскасини олиб қўйиш энг сўнгги чора эканини маҳаллий кенгаш ва жамоатчилик олдида исботлаб бериши керак бўлади.
Энди «снос»га тушган бино учун компенсасия тўлашга зарур маблағ бўлмаса, бундай ташаббус билан чиқилмайди, яъни «бузаверайликчи компенсасия бир гап бўлар» қабилидаги гаплар кетмайди», — деб ёзади Русланбек Давлетов.
Ҳуқуқ эгаси билан келишувга эришилмаган тақдирда, ҳуқуқ эгасини келишувни имзолашга жисмонан мажбур қилиш мақсадида турар ёки нотурар жойни сув, канализация, электр, алоқа (интернет ҳам), иссиқлик ва газ тармоқларидан узиб қўйишга, кириб чиқиш йўлини тўсиб қўйишга йўл қўйилмайди.
Энди қуйидаги ҳуқуқлар компенсация қилиб берилиши аниқ қилиб белгилаб қўйиляпти:
- кўчмас мулк объектларининг бозор қиймати;олиб қўйилган ер участкасига бўлган ҳуқуқнинг бозор қиймати (қишлоқ хўжалиги ерларидан ташқари);
- кўп йиллик дов-дарахтларнинг бозор қиймати;
- кўчиш ва бошқа уйни вақтинчалик ижарага олиш билан боғлиқ харажатлар;
- ер участкасидан ва унда жойлашган кўчмас мулк объектларидан фойдаланишдан олиниши мумкин бўлган бой берилган фойда;
- ҳуқуқ эгасининг бошқа харажатлари ва зарарлари.
Яна бир муҳим кафолат шундан иборатки ҳуқуқ эгасига қонуний тегишли бўлган ерда ўзбошимчалик билан қурилган турар ва нотурар жойлар учун ҳам компенсация тўлиқ берилади.
Бундан ташқари бузишга тушганда компенсация бериладиган уй-жойлар кўлами кенгайтирилди – энди агар аҳоли пункти ичида жойлашган, лекин «кадастри бўлмаган» уйлар бузилса ҳам, агар ушбу ер бўйича 15 йилдан ортиқ солиқлар тўлаб келинган бўлса компенсация тўланади. Таъбир жоиз бўлса, ушбу қонун 3 миллионга яқин ҳужжатсиз уйларни бузилишдан «суғурталайди».
Замонамизда бирор бир жараённи рақамлаштиришсиз тасаввур қилиб бўлмайди, шунга яраша эндиликда «снос» билан боғлиқ барча ҳуқуқий жараёнлар электрон тизимлар орқали амалга оширилади, шу жумладан, қабул қилинган қарорлар, тузилган шартномалар ва берилган компенсацияларнинг ҳисоби электрон юритилади.
Фуқароларимизни қонун кучга киргач, амалиётда ундан ўз ҳуқуқ ва манфаатларини ҳимоя қилишда фаол фойдаланишга чақириб қоламиз», — деб фикрларини якунлаган Адлия вазири.
Изоҳ (0)