Turkiyaning Egridir shahridagi “Komando” o‘quv markazi bazasida yetakchi davlatlarning harbiy xizmatchilari o‘rtasida “Eng ilg‘or merganlar jamoasi” nomli xalqaro musobaqa o‘tkazildi. Bu haqda O‘zbekiston Mudofaa vazirligi matbuot xizmati “Daryo”ga ma’lum qildi.
Ma’lum qilinishicha, musobaqa Germaniya, Bahrayn, Qatar, Ozarbayjon kabi dunyoning 12 davlatidan jami 33 ta jamoa, Turkiyaning o‘zidan esa dengiz maxsus kuchlari, quruqlikdagi maxsus kuchlari, maxsus operatsiyalar kuchlari kabi alohida qo‘shin turlaridan jami 15 ta jamoa ishtirok etgan.
Kunduzgi va tungi mashg‘ulotlarni o‘z ichiga olgan musobaqa bellashuvlari o‘n kun davomida o‘tkazilgan. Ushbu xalqaro musobaqaning boshqa merganlik musobaqalaridan farqi shundaki, unda vertolyot va qayiqda ham xarakat vaqtida otish mashqlari bajarilgan.
Shuningdek, musobaqaning hech bir bosqichida lazerli masofa o‘lchagichlardan foydalanishga ruxsat berilmagan, merganlar 1000 metr va undan ortiq masofada bo‘lgan nishonni optik moslamalar yordamida aniqlab, belgilangan vaqt orasida uni yakson qilgan.
Bundan tashqari, musobaqa ishtirokchilari tunggi vaqtda magnit azimuti bo‘yicha tog‘li hududda 6 soat davomida harakatlanib, noaniq masofadagi nishonni yakson etgan.
“O‘zbekiston Mudofaa vazirligi jamoasi vakillari uchun musobaqa o‘tkazilgan hudud butkul notanish, nishonlar va mashqlar haqida to‘liq ma’lumotlar bo‘lmasada, harbiy xizmatchilarimiz barcha shartlarni muvaffaqiyatli bajarib, 12 ta davlat jamoalari orasida faxrli ikkinchi o‘rinni qo‘lga kiritishgan. Birinchi o‘rin mezbon davlat vakillariga nasib etgan”, — deyiladi xabarda.
Bundan oldin, o‘zbekistonlik harbiylar Britaniyada o‘tkazilgan “Kembriya patruli” musobaqasida 2-o‘rinni egallagani, O‘zbekiston jamoasi “ArMI-2021” xalqaro armiya o‘yinlari yakuni bo‘yicha umumjamoa hisobida 2-o‘rinni egallagani to‘g‘risida xabar berilgandi.
Izoh (0)