АҚШ президенти Жо Байден маъмурияти мамлакатда маймунчечакнинг тарқалишига жавобан ўн минглаб вакцина дозаларини тарқатишни режалаштирмоқда. Бу ҳақда Washington Post газетаси ушбу масаладан хабардор одамларга таяниб хабар бермоқда.
Вакцина дозалари касалланиш ҳолатлари энг кўп аниқланган штатлар ўртасида тақсимланади, деди манбалар.
Режага кўра, Гавайи, Массачусетс, Юта, Иллинойс, Нью-Йорк, Род-Айленд, Калифорния, Колорадо, Флорида ва Вашингтон штатлари вакцинани биринчи оладиган штатлар бўлади.
Режа бўйича Жйннеос вакцинасининг жами 25 — 30 минг дозаси ажратилиши керак. Жйннеос — федерал регуляторлар томонидан маймунчечакнинг олдини олиш учун махсус тасдиқланган ягона вакцина.
«Келгуси ҳафта ёки ундан кўпроқ вақт ичида мавжуд Жйннеос вакциналарининг бир қисмини тарқатиш режалаштирилмоқда», — деди нашр суҳбатдошларидан бири.
Расмий маълумотларга кўра, ҳозиргача Қўшма Штатларда 306 кишида маймунчечак қайд этилган. Аммо нашр билан суҳбатлашган экспертлар асл ҳолатлар бундан кўпроқ, деб ҳисобламоқда.
Эслатиб ўтамиз, ЖССТ маймунчечак тарқалишини халқаро аҳамиятга молик фавқулодда ҳолат эмас, деган хулосага келганди.
Изоҳ (0)