Бирлашган Миллатлар Ташкилоти донорларни Афғонистондаги зилзиладан жабрланганларга зудлик билан 110 миллион доллар ёрдам беришга чақирди. Бу ҳақда БМТ сайтига таяниб, «Интерфакс» хабар берди.
Сўралган маблағ зилзиладан энг кўп жабр кўрган Пактика ва Хост вилоятларидаги 362 минг кишига келгуси уч ой давомида фавқулодда ёрдам кўрсатиш учун мўлжалланган.
Қайд этилишича, Афғонистондаги зилзила оқибатида турар жой бинолари, тиббиёт муассасалари бинолари ва мактаблар вайрон бўлган. Бундан ташқари, сув ва электр таъминоти тизимлари ҳам шикастланган.
«Янги мурожаат Афғонистонга гуманитар ёрдам режасининг устувор қисми бўлиб, ушбу режа жорий йилда 4,4 миллиард доллар ажратишни назарда тутади. Афсуски, режа атиги 34 фоиз молиялаштирилди»,— дейилади ҳисоботда.
Ўтган ҳафта БМТнинг Фавқулодда вазиятлар бўйича гуманитар координатори Мартин Гриффиц Фавқулодда вазиятларда ҳаракат қилиш марказий жамғармасидан Афғонистонга 10 миллион доллар ажратиш қарорини эълон қилган эди.
Эслатиб ўтамиз, 22 июнга ўтар кечаси Афғонистоннинг жануби-шарқий минтақасида 6,1 магнитудали зилзила содир бўлди. Бунинг оқибатида 1,5 минг киши ҳалок бўлган, 2 минг киши жароҳатланган, минглаб иншоотлар вайрон бўлган.
Изоҳ (0)