JSST Favqulodda vaziyatlar qo‘mitasi maymunchechakning so‘nggi avj olishi xalqaro ahamiyatga molik favqulodda holat (PHEIC — Public Health Emergency of International Concern) emas, degan xulosaga keldi. Qo‘mita tashkilot rahbari Tedros Gebreyesusga kasallikni bunday deb tan olmaslikni tavsiya qildi. Gebreyesus tavsiyani qabul qiladi, deyiladi JSST bayonotida.
“Ba’zi a’zolar turli fikrlarni bildirgan bo‘lsa-da, qo‘mita konsensus orqali JSST bosh direktoriga ushbu bosqichda epidemiya PHEIC’ni tashkil etmasligi kerakligi haqida maslahat berishga qaror qildi”, — deyiladi tashkilot bayonotida.
PHEIC — 2005-yildagi Xalqaro sog‘liqni saqlash qoidalariga muvofiq aholi salomatligi uchun xavflilikning eng yuqori darajasidir. JSST COVID-19 pandemiyasining boshida ushbu darajani e’lon qilgan.
Shu bilan birga, qo‘mita maymunchechakning hozirgi avj olishi ko‘p jihatdan g‘ayrioddiy ekanini, jumladan chechakning bu turi ilgari qayd etilmagan mamlakatlarda ham borligini ta’kidladi.
“Qo‘mita a’zolaridan ayrimlari aholining chechakka qarshi immuniteti pastligini hisobga olib, kasallik aholi orasida yanada barqaror tarqalishi mumkinligini va buni e’tibordan chetda qoldirmaslik kerakligini bildirdi”, — deyiladi bayonotda. Qo‘mita, shuningdek, ko‘p yillar davomida Afrikada maymunchechak virusining tarqalishiga e’tibor berilmagani va kasallik yomon nazorat qilinganini ta’kidladi.
Qo‘mita virus tarqalishiga qarshi kurashda intensiv choralar ko‘rish maqsadida vaziyatning favqulodda xususiyatini bir ovozdan tan oldi.
Izoh (0)