Украинанинг Херсон шаҳрига раҳбарлик қилиб келган Игорь Колихаев қўлга олинди, бу ҳақда Херсон вилоятининг ҳарбий-фуқаролик маъмурияти раҳбари ўринбосари Кирилл Стремоусов маълум қилди, деб ёзади «РБК».
«Нацистлар орасида мэр — қаҳрамон бўлиб ҳисобланувчи собиқ мэр Колихаев қўлга олинди. У денацификация жараёнида кўп нарсага халал берган, бу жараёнларни рад этишга чақирган, очиқдан-очиқ масхара қилган одамдир», — деди Стремоусов.
Колихаевнинг маслаҳатчиси Галина Ляшевская маълум қилишича, у 28 июнь куни эрталаб, мэриянинг қолган ходимлари ишлайдиган коммунал муассасалардан бирига келган пайтида қўлга олинган. Унинг сўзларига кўра, операцияда «Росгвардия» жангчилари ва, эҳтимол, Федерал хавфсизлик хизмати ходимлари қатнашган.
Россия Мудофаа вазирлиги Херсон вилояти устидан тўлиқ назорат ўрнатилгани ҳақида март ўрталарида эълон қилган эди, 9 апрелда шаҳар маъмурияти биносига Россия байроғи ўрнатилди. Апрель охирида Херсон шаҳри ва вилоятига янги раҳбарлар тайинланди.
Ўшанда шаҳар ҳарбий-фуқаролик маъмурияти Колихаев «ҳамкорлик қилишни истамагани»ни айтганди. Ўтган ҳафта Стремоусов Украина собиқ мэри «Херсон вилоятидаги ишларга путур етказаётгани, буйруқлар чиқараётгани» ҳақида шикоят қилганди. Унинг сўзларига кўра, Колихаев «Украина ҳукумати вакили сифатида шаҳарни бошқаришда давом этмоқда».
«Бизда ҳатто баъзи туманларда нацистлар ўтириб, маъмуриятларни бошқармоқда. Бу нацистларни, қўрқув уруғини сочиб, вайронкор усулларни давом эттираётган фашизм шерикларини тозалаб ташлаҳ учун бизга нима халал беряпти?» — деганди Стремоусов.
24 июнь куни Херсонда ХБК микротуманида портлаш содир бўлиб, оқибатда ёшлар ва спорт бошқармаси бошлиғи Дмитрий Савлученко ҳалок бўлди. Ҳарбий-фуқаролик маъмурияти ҳодисани теркат деб атади.
Изоҳ (0)