Россия Украина билан «адолатли сулҳ» тузмагунича, унга қарши санкциялар ўз кучида қолади. Бу ҳақда Германия канцлери Олаф Шольц G7 саммитида маълум қилди, деб ёзади «РБК».
Тинчлик битими шартлари Киевга мажбурлаб юкланмаслиги учун, «Еттилик» мамлакатлари Москвага санкциялар билан босим ўтказишда давом этиши керак, деб ҳисоблайди Шольц.
Май ойида канцлер Берлин «Украинага зўрлаб ўтказилган сулҳ»ни қабул қилмаслигини таъкидлаганди. У Киевга бундан кейин ҳам ёрдам беришни ваъда қилган, бироқ Россия ва НАТО ўртасида ҳарбий тўқнашувга йўл қўймасликка чақирган эди.
Украинадаги ҳарбий операция февраль охирида бошланди. Жанговар ҳаракатлар бошланганидан кейин деярли дарҳол низо томонлари эҳтимолий сулҳ шартларини муҳокама қила бошлади. Март охирида Истанбулдаги учрашувдан кейин Россия делегацияси Украина вакилларидан тартибга солиш бўйича таклифларни ёзма шаклда қабул қилди, қарийб бир ойдан кейин эса Киевга ўз таклифларини топширди, аммо ундан жавоб олмади. Апрелда Кремль Украинадаги махсус операцияни музокаралар йўли билан якунламоқчи эканини маълум қилди. Бироқ кўп ўтмай, музокаралар Киевнинг ташаббуси билан тўхтатиб қўйилди: у ердан маълум қилишларича, мулоқотга Бучадаги воқеалар ўз таъсирини ўтказган.
Россия президенти матбуот котиби Дмитрий Песков 23 июнь куни Украина Россиянинг барча талабларини бажаргандан кейин Москва тинчлик битимига тайёр бўлишини айтди.
Украина президенти Владимир Зеленский май охирида жанговар ҳаракатлар чоғида бой берилган ҳудудлар қайтарилсагина музокараларга розилик беришини айтди. Россия ТИВ бундай позицияни танқид қилиб, Киевнинг низо учун тинч ечим топиш ниятининг самимийлигига шубҳа билдирди. Украина делегацияси раҳбари Давид Арахамия июнь бошида мулоқот қайта бошланиши учун Украинанинг музокаралар позициясини кучайтириш кераклигини, буни, шу жумладан, хориждан қурол-яроғ етказиш орқали амалга ошириш зарурлигини айтди. Кейинроқ у Киевнинг музокаралар позиция август охирига режалаштирилган Украина қуролли кучларининг контрҳужуми мустаҳкамлай олиши мумкинлигини тахмин қилди.
Аввалроқ Шольц Украина атрофидаги вазият юзасидан Россияга қарши киритилган санкциялар Москва Киев билан «адолатли келишув»га эришмагунча кучда қолишини маълум қилганди.
Мавзуга доир: Шольц Путин Россияга «демократия учқуни» сачрашидан қўрқишини айтди
Изоҳ (0)