Россия Ҳаво-космик кучлари 27 июнь куни Кременчугда юқори аниқликдаги ракеталар билан «АҚШ ва Европа мамлакатларидан келиб тушган қурол-яроғ ва ўқ-дорилар сақланадиган омборга» зарба берган. Ушбу омборлар Кременчуг йўл машиналари заводи яқинида жойлашган бўлган. Бу ҳақда муассаса брифинг чоғида маълум қилди, деб ёзади Meduza.
«Юқори аниқликдаги зарба натижасида, Ғарбда ишлаб чиқарилган ва Донбассдаги Украина қўшинлари гуруҳларига юбориш учун омбор ҳудудига жойлаштирилган қурол-яроғ ва ўқ-дорилар нишонга олинди. Ғарб қуролларининг ўқ-дорилари портлаб кетиши завод ҳудуди яқинида жойлашган, фаолият олиб бормаётган савдо марказида ёнғин келиб чиқишига сабаб бўлди», — дейилди брифингда.
Аввалроқ Украина президенти Владимир Зеленский Россияни Полтава вилоятининг Кременчуг шаҳридаги «Амстор» савдо марказига ракета билан зарба беришда айблади. Унинг сўзларига кўра, ҳужум чоғида бинода мингдан ортиқ одам бўлган. Сўнгги маълумотларга кўра, 20 киши ҳалок бўлиб, 59 киши жабрланган, 30 киши бедарак йўқолган.
Украина ҳарбийлари даъво қилишича, Кременчугга Курск вилоятидан туриб узоқ масофали Ту-22 М3 бомбардимончи самолётлар ёрдамида иккита Х-22 ракеталари билан зарба берилган. 28—30 июнь кунлари Кременчугда савдо марказида ҳалок бўлганлар хотирасига мотам эълон қилинди.
Изоҳ (0)