Туркманистоннинг собиқ президенти Гурбангули Бердимуҳамедовнинг таваллуд топган куни (29 июнь) муносабати билан Ашхободдаги Иккинчи истироҳат боғи ўрнида барпо этилаётган «Тошкент» боғи очилиши режалаштирилмоқда.
«Хроника Туркменистана» нашри мухбирларининг хабар беришича, ҳозирда боғдаги қурилиш панжаралари олиб ташланяпти, йўллар ювиляпти.
Бундан ташқари, ой охирида мамлакатда бутун бир ҳафта давомида Маданият ва санъат ходимлари куни ҳамда Махтумқули Фироғий шеърияти куни нишонланади. Байрам тадбирлари катта Бердимуҳамедовнинг таваллуд кунига бағишланган катта концерт билан якунланади.
Гурбангули Бердимуҳамедов Ўзбекистон ташқи ишлар вазири Абдулазиз Комиловнинг 2021 йил 17 февраль куни Туркманистонга ташрифи чоғида унга Ашхобод шаҳрида Тошкент боғи қурилиши ҳақида маълум қилганди. Эртаси куни «Нейтрал Туркманистон» газетаси боғни лойиҳалаш ва қуриш бўйича тендер эълон қилди. Буюртмачи Ашхобод шаҳри ҳокимлиги эди.
2021 йилнинг 17 март куни Тошкент шаҳар ҳокими Жаҳонгир Ортиқхўжаев бошчилигидаги делегация амалий ташриф билан Ашхободда бўлди ва Ашхобод ҳокими билан учрашувда «Тошкент боғи»нинг дастлабки лойиҳаси билан танишди.
2017 йил октябрь ойида Тошкентда Ашхобод боғи очилган эди, унда фаввора, саккиз қиррали юлдуз кўринишидаги гулзорлар, шунингдек, архитектураси Ашхободдаги халқаро аэропортга тақлид қилувчи амфитеатр барпо қилинган.
Изоҳ (0)