Дунё янги пандемияга тайёр эмас, деди Жаҳон соғлиқни сақлаш ташкилоти (ЖССТ) бош директори Тедрос Адханом Гебрейесус Жакартада G20 давлатлари соғлиқни сақлаш вазирларининг учрашуви доирасидаги матбуот анжуманида.
«Биз ушбу пандемиядан (коронавирус) олган сабоқларимизга жиддий қарашимиз ва дунёни (пандемияга) тайёрлаш бўйича тавсияларга амал қилишимиз керак. Биз ҳали пандемия ўртасида турибмиз. Дунё тайёр эмас. Агар бошқа вирус тарқалса, бошқа пандемия бошланадиган бўлса, биз бунга тайёр эмасмиз», — деди ЖССТ раҳбари ташкилотнинг ижтимоий тармоқларида эфирга узатилган матбуот анжуманида.
ЖССТ бош директори, шунингдек, COVID-19 билан курашиш бўйича тавсияларни тўлиқ амалга ошириш муҳимлигини таъкидлади. «Ҳар бир мамлакатда тавсияларни амалга ошириш учун жуда тез ҳаракат қилишимиз керак, шундагина кейинги пандемияни олдини оламиз», — дея қўшимча қилди у.
2020 йил 11 март куни Жаҳон соғлиқни сақлаш ташкилоти COVID-19 тарқалишини пандемия деб эълон қилган эди. Жорий йилнинг апрель ойида бутун дунёда коронавирус билан касалланганлар сони жами 500 миллиондан ошди.
Изоҳ (0)