Президент Қосим-Жўмарт Тўқаев Қатар Иқтисодий форумининг махсус сессияси — In Conversation with President Tokayev’да иштирок этди. Тадбирни Bloomberg телевидениеси бошловчиси Манус Кранни олиб борди, дея ёзади Tengrinews нашри Акорда сайтига таяниб.
Савол-жавоб тарзида ўтган очиқ ва самимий мулоқотда Қозоғистон президенти халқаро сиёсатдаги долзарб муаммоларга, айниқса, Европада давом этаётган геосиёсий ўзгаришлар, Россия-Украина можароси атрофидаги воқеалар контекстидаги бир қатор саволларга жавоб берди.
Россия-Украина можаросини тинч йўл билан ҳал қилиш истиқболлари ҳақидаги саволга жавоб берар экан, Қозоғистон раҳбари музокаралар жараёнини давом эттириш муҳимлигини таъкидлади. Қосим-Жўмарт Тўқаевнинг сўзларига кўра, ушбу можарони ҳал қилишда томонларнинг ҳар бирининг ҳаракати зарур. Шу билан бирга, у халқаро ҳамжамиятдаги келишмовчиликлар ва БМТ Хавфсизлик Кенгашининг бу масалани ҳал қилишдаги заифлигига ишора қилди.
«БМТ ҳеч қачон бундай ноқулай вазиятга тушиб қолмаган. Ҳатто совуқ уруш даврида ҳам БМТ анча бирлашган эди. Мен БМТ билан келажакда нима бўлишидан жуда хавотирдаман. Шу билан бирга, кўп қирралиликка қатъий ишонаман ва халқаро ҳамжамият янада ҳамжиҳат бўлиши, бирдамлик кўрсатиши ва, албатта, ҳар икки давлатнинг тинчликка келиши учун ижобий таъсир кўрсатиши кераклигига тўла ишонаман», — деди Қозоғистон президенти.
Тўқаев бошловчининг Россияга нисбатан мисли кўрилмаган санкциялар сиёсати шароитида Қозоғистон дуч келиши мумкин бўлган иқтисодий оқибатларга оид саволларига ҳам жавоб берган.
Очиқ мулоқот чоғида жаҳон энергетика бозоридаги мавжуд вазият билан боғлиқ глобал муаммолар, халқаро савдо хавотирлари ҳам муҳокама қилинган.
Эслатиб ўтамиз, Қосим-Жўмарт Тўқаев Қатар амирининг шахсий таклифига биноан Доҳага борди. Қозоғистон раҳбари аввалроқ Қатар иқтисодий форумининг очилиш маросимида иштирок этди, шунингдек, Қатар амири Шайх Тамим бин Ҳамад ат-Таний билан учрашди.
Изоҳ (0)