Ўзбекистонда 2022 йилнинг ўтган 5 ойи давомида 3449 та ёнғин содир бўлган. Бунинг оқибатида 82 киши жароҳат олган бўлса, 48 киши ҳалок бўлган. Бу ҳақда ФВВ бош бошқарма бошлиғи Ўлмас Музаффаров маълум қилди.
Маълум қилинишича, ушбу кўрсаткичлар ўтган йилнинг мос даврига нисбатан камайган — ёнғинлар сони 567 тага, жароҳат олганлар — 26 тага, ҳалок бўлганлар 8 тага.
Ўлмас Музаффаровнинг сўзларига кўра, кунларнинг кескин исиб кетиши эвазига май ойи ва июнь ойининг биринчи ўн кунлигида ёнғинлар билан боғлиқ вазият фаоллашгани кузатилмоқда. Ушбу даврда содир бўлган ёнғинлар 981 тани ташкил этиб, 106 таси қуриган ўсимликларнинг ёниши, 665 таси аҳоли турар жойлари ва 210 таси бошқа объектларга тўғри келган.
Ёнғин келиб чиқиш сабаблари таҳлил қилинганда, аксарият ҳолларда аҳоли яшаш жойларидаги ёнғинлар маиший кондиционер ва музлаткичлардан ҳамда тозаланмаган қуруқ ўтларнинг ёнишидан келиб чиқаётгани маълум бўлмоқда.
Мутахассис бу каби ҳолатларда қандай йўл тутиш кераклиги бўйича масалаҳатлар берган:
- 5,3 кВт қувватига эга кондиционер, юзаси 2,5 миллиметрдан кам бўлмаган, икки ҳимояли мис симлар орқали 25 Амперлик ҳимоя автоматига уланиши лозим;
- 7,5 кВт қувватига эга кондиционер юзаси 4 мм дан кам бўлмаган, икки ҳимояли мис симлар орқали 35 Амперлик ҳимоя автоматига уланиши лозим.
- кондиционерни улашда алюмин симлардан фойдаланиш тавсия этилмайди;
- ортиқча юкланиш ва электр симларининг қизиб, ёнишининг олдини олиш мақсадида кондиционер электр узаткич орқали уланмаслиги ва битта электр манбаидан бир неча электр ускуналар фойдаланмаслиги керак;
- кондиционер махсус ишланган, ерлантирилган ва соз ҳолдаги электр розеткадан қувватланиши лозим;
- кондиционернинг электр таъминоти алоҳида кабел орқали умумий электр қутисидан тўғридан-тўғри уланиши керак;
- кондиционер электр симлари ташқи ҳимоя қобиқларининг бутлиги, бир бирига пайвандлаш, оппрессовка ёки махсус зажимлар орқали уланиши ва ҳимоя автоматларига маҳкамланиши лозим.
Аввалроқ Когон шаҳрининг «Газчилар» қўрғонида ёнғин содир бўлгани, Тошкентда ёнаётган уйдан икки нафар фуқаро қутқариб олингани, Наманганда бир-бирига туташ хонадонларда ёнғин чиққани тўғрисида хабар берилганди.
Изоҳ (0)