«Энергетика вазирлиги ҳузуридаги Миллий диспетчерлик маркази давлат унитар корхонасининг фаолиятини ташкил этиш чора-тадбирлари тўғрисида»ги Вазирлар Маҳкамаси қарори қабул қилинди.
Марказ ташкилий-ҳуқуқий шаклидан қатъи назар, ягона электр энергетика тизимига уланган ташкилотларни марказлашган, узлуксиз, оператив-диспетчерлик бошқарувини амалга оширади ҳамда ушбу тизимнинг ишлашини қўшни давлатлар энергетика тизимлари билан параллел равишда бошқаради.
Марказнинг асосий вазифалари қуйидагилардан иборат:
- талаб ва таклифдан келиб чиққан ҳолда, шунингдек, электр энергиясини ишлаб чиқариш ва истеъмол қилишга таъсир этувчи барча омилларни ҳисобга олган ҳолда электр энергиясини ишлаб чиқариш ва истеъмол қилишнинг соатлик режимини шакллантириш;
- фавқулодда режимларнинг пайдо бўлишининг олдини олиш, уларни бартараф этиш ва авария ҳолатини бартараф этгандан кейин тизимнинг ишини тиклаш ва бошқалар.
Энергетика вазирлиги бир ой муддатда:
- Миллий диспетчерлик маркази юқори малакали мутахассис ходимлар билан тўлдириш чораларини кўради;
- Миллий диспетчерлик марказининг 2022 йил учун даромадлар ва харажатлар сметасини тасдиқлайди ва Молия вазирлигига рўйхатдан ўтказиш учун киритади.
Изоҳ (0)