Ijtimoiy tarmoqlarda Namangan shahridagi “Alpomish” MFYda joylashgan xonadonlarning birida yong‘in chiqqani tasvirlangan video tarqaldi. Namangan viloyati FVB holat bo‘yicha ma’lumot berdi.
Ma’lum qilinishicha, 7-iyun kuni soat 10:00 da “Alpomish” MFY Buramatut ko‘chasida joylashgan xonadonda yong‘in sodir bo‘layotgani to‘g‘risida shahar FVBga xabar kelib tushgan. Xabarga ko‘ra 5 ta yong‘in-qutqaruv ekipaji soat 10:12 da voqea joyiga yetib borib, yong‘in soat 10:20 da qurshab olingan va soat 11:10 da o‘chirilgan.
Yong‘in natijasida bir-biriga tutash qurilgan xonadonlarning taxminan 155 kvadrat metr maydonda tomi, shift qismi va uy-jihozlari yonib, zararlangan. Hodisa oqibatida tan jarohati olish va halok bo‘lish holatlari qayd etilmagan.
“Hozirda yong‘inning kelib chiqish sababi va moddiy zarar miqdori aniqlanmoqda”, — deyiladi xabarda.
Avvalroq Toshkentdagi “Rayhon” oshxonasida yong‘in sodir bo‘lgani, Sergelidagi xonadonlarning birida yong‘in chiqqani to‘g‘risida xabar berilgandi. Mavzuga doir:
