Олий Мажлис Сенатининг йигирма еттинчи ялпи мажлисида «Ўзбекистон Республикасининг айрим қонун ҳужжатларига ўзгартиш ва қўшимчалар киритиш, шунингдек айрим қонун ҳужжатларини ўз кучини йўқотган деб топиш тўғрисида»ги қонун кўриб чиқилди. Бу ҳақда парламент юқори палатаси матбуот хизмати хабар берди.
Ушбу қонун билан давлат ҳокимияти ва бошқаруви органлари томонидан очиқлик тўғрисидаги қонунчиликни бузганлик учун маъмурий жавобгарлик белгиланмоқда.
Хусусан, Очиқ маълумотлар сифатида жойлаштириладиган, ижтимоий аҳамиятга молик бўлган маълумотлар рўйхатига киритилган маълумотларни эълон қилмаганлик ёки тўлиқ эълон қилмаганлик, эълон қилиш муддатларига ва тартибига риоя этмаганлик ёки маълумотларни бузиб кўрсатганлик учун мансабдор шахслар базавий ҳисоблаш миқдорининг 3 бараваридан 5 бараваригача (1,5 миллион сўмгача), агар маъмурий жазо чораси қўлланилганидан кейин бир йил давомида такрор содир этилган бўлса, 5 бараваридан 10 бараваригача (3 миллион сўмгача) миқдорда маъмурий жаримага тортилиши назарда тутилмоқда.
«Gazeta.uz»нинг ёзишича, Коррупцияга қарши курашиш агентлиги бундай ҳуқуқбузарликлар юзасидан маъмурий баённомалар тузиб, кўриб чиқиш учун судга юбориши мумкин.
Сенат раиси Танзила Норбоева буни давлат идораларининг жамият учун очиқлиги ва шаффофлиги йўлидаги «яна бир муҳим қадам» деб атаган.
Июнь ойидан бошлаб давлат органлари ўз фаолияти, жумладан, харидлар, хизмат сафарлари, хизмат автомашиналари ва уй-жойлар бўйича 33 турдаги очиқ маълумотлар тўпламини эълон қилиб бориши шарт.
Бундан ташқари, қонун билан дебиторлик ва кредиторлик қарзи муддатларини ўтказиб юбориш ҳамда корхоналарнинг ҳисобварақларида тегишли маблағлар бўлган ҳолда тўловларни амалга оширишнинг белгиланган муддатларини бузганлик, шу билан бирга, шартнома мажбуриятларини бажармаслик ёки лозим даражада бажармаслик оқибатида хўжалик юритувчи субъектларга мулкий зарар етказиш каби ҳуқуқбузарлик учун маъмурий жавобгарлик бекор бўлмоқда.
Шунингдек, қонун ҳужжатларига нодавлат суд-экспертларининг суриштирув, дастлабки тергов ва суд иш юритувидаги иштироки ҳамда улар ваколатини назарда тутувчи янги нормалар киритилмоқда.
Шу билан бирга, адвокат касбий фаолиятини амалга ошириш чоғида яна бир қанча ҳуқуқларга эга бўляпти. Жумладан, иқтисодий, фуқаролик ва маъмурий иш юритилаётганда судга қадар тайёргарлик чоғида ҳамда суд жараёнида ишонч билдирувчи шахснинг розилиги билан давлат ва нодавлат суд-экспертиза ташкилотлари томонидан шартнома асосида экспертиза ўтказилишини сўраш, шунингдек, экспертиза хулосаси иш материалларига қўшиб қўйилишини ва суд томонидан ушбу хулоса ишдаги мавжуд далиллар билан биргаликда баҳоланишини талаб қилиш ҳуқуқи шулар жумласидандир.
Бундан ташқари, фуқаролик, маъмурий ва иқтисодий суд ишларини юритишда эксперт сифатида нодавлат суд-экспертиза ташкилотининг эксперти ҳам иштирок этиши мумкинлиги назарда тутилмоқда.
Қонун сенаторлар томонидан маъқулланган.
Изоҳ (0)