Боливия суди мамлакат собиқ муваққат президенти Жанин Аньесни 2019 йилдаги давлат тўнтариши ҳақидаги иш бўйича 10 йил қамоққа ҳукм қилди, деб ёзади «РБК».
Боливия Бош прокуратураси Конституция ва қонунларга зид жиноий резолюцияларни чиқаргани, шунингдек, хизмат мажбуриятларини бузгани учун 15 йиллик қамоққа ҳукм қилишни сўраган эди. Бироқ суд жазо муддатини камайтирди.
Жанин Аньес Боливия сенатида иккинчи вице-спикер ва мухолифат етакчиси бўлган. 2019 йил ноябрида, Боливияда сиёсий инқироз юз берганида, 13 йил давомида мамлакат раҳбари лавозимини эгаллаб келган Эво Моралесни истеъфога юборган Аньес ўзини янги сайловларга қадар президент вазифасини бажарувчи деб эълон қилди. Вақтинчалик ҳукуматга қарши норозиликлар фонида Аньес полицияни тартибни тиклашга чақирди, 14 ноябрда эса ҳарбийларни тартибни сақлаш чоғидаги ҳаракатлари учун ҳар қандай жиноий жавобгарликдан озод қилувчи фармонни имзолади.
2020 йил октябрида мамлакатда янги сайловлар бўлиб ўтди, унинг якунларига кўра, Моралеснинг маслакдоши Луис Арсе президент бўлди.
2021 йил мартида Аньес ва унинг маъмуриятидаги бир нечта юқори мансабли амалдорлар давлат тўнтаришини уюштирганлик ва унда қатнашганлик айблови билан ҳибсга олинди.
Тергов Аньес конституция қоидалари ва қонунларни бузган ҳолда, ўзини ноқонуний равишда Боливия президенти деб эълон қилган, деган қарорга келди.
Изоҳ (0)