Путин: Россия Туркманистоннинг бетарафлик мақомига ҳурмат билан қарайди

Россия Туркманистоннинг асосий иқтисодий шерикларидан бири ҳисобланади. Ўтган йили икки томонлама товар айланмаси 865 миллион долларни ташкил этган бўлса, жорий йил биринчи чораги якунларига кўра, ўзаро савдо яна 45 фоизга ўсди. Бу ҳақда Россия президенти Владимир Путиннинг туркманистонлик ҳамкасби Сердар Бердимуҳамедов билан музокараларидан кейин тарқатилган қўшма баёнотда айтилади, деб ёзади Anadolu агентлиги.

Учрашувда алоҳида эътибор энергетика мавзусига қаратилди, иккала томон ҳам Россия ва Туркманистоннинг тегишли идоралари линияси бўйича ҳамкорлик ўрнатиш, ишбилармонлик доираларининг ўзаро манфаатли ташаббусларни амалга оширишни давом эттиришга қаратилган ҳаракатларини қўллаб-қувватлашга қизиқиш билдирди.

Саноат кооперациясини янада ривожлантириш каби муҳим мавзуга ҳам тўхтаб ўтилди, бир қанча йирик қўшма лойиҳалар муваффақиятли амалга оширилаётгани қайд этилди.

Иккала томон ҳам қурилиш соҳасида янги катта кўламли ташаббусларни амалга оширишга тайёрлигини билдирди.

Туркманистон етакчиси билан музокаралар чоғида Путин Россия Туркманистоннинг нейтрал (бетарафлик) мақомига ҳурмат билан муносабатда бўлишини айтганди.

Президентнинг сўзларига кўра, Москва, шунингдек, Ашхободнинг Евросиё иқтисодий иттифоқи ва Шанхай ҳамкорлик ташкилоти линияси бўйича ривожланаётган интеграция жараёнларига ўсиб бораётган қизиқишини маъқуллайди.

Путин қайд этишича, «Марказий Осиё бешлиги плюс Россия» форматидаги ҳамкорлик ҳам истиқболли бўлиб кўринмоқда.

Шунингдек, 10 июнь, жума куни Путин Бердимуҳамедов билан Кремлда бўлиб ўтган учрашувда икки мамлакат алоқаларини ривожлантириш ҳақида ҳужжат имзоланишини эълон қилди.

«Бугун ўзаро алоқаларимизга тааллуқли бўлган жуда муҳим ҳужжатни имзолаймиз», — деди Россия президенти.

У Туркманистон билан алоқаларни «ҳақиқатда стратегик» деб атади.

«Барча йўналишлар бўйича алоқаларни ривожлантиряпмиз, улар ҳақиқатда, расман эмас, аслида ҳам стратегик эканини қайд этиш кишини жуда қувонтиради», — деди Путин.

Эслатиб ўтамиз, май ойида Россия президенти Владимир Путин Туркманистон раҳбари Сердар Бердимуҳамедовни Дўстлик ордени билан тақдирлаш тўғрисида фармон имзолаган эди. Кремлдаги учрашувда эса уни шахсан топширди.