Тошкент вилоятининг Оҳангарон туманида ЙҲХБ инспектори томонидан машинаси жарима майдонига олиб кетилаётган вақтда ҳайдовчи автомобилдан ўзини ташлаб юборди. Бу ҳақда ИИВ матбуот котиби Шоҳрух Ғиёсов маълум қилди.
Маълум қилинишича, 20 май куни туманнинг «Ўзар» қишлоғи ҳудудидан ўтган Нурафшон—Оҳангарон автомобиль йўлининг 52 километрида «ВАЗ-2121» русумли автомашина ЙҲХБ инспекторлари томонидан текшириш учун тўхтатилганида, 27 ёшли ҳайдовчи Ғ.Ш.нинг автотранспорт бошқариш учун меъёрий ҳужжатлари йўқлиги аниқланган.
Ҳайдовчига нисбатан Маъмурий жавобгарлик тўғрисидаги кодекснинг 135-моддаси (йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) 1-қисми билан электрон маъмурий баённома расмийлаштирилган. Автомашинани вақтинчалик жарима майдонига жойлаштириш учун ЙҲХБ инспектори бошқарувида ҳаракатланиб кетаётганида, автотранспорт олд ўриндиғида ўтирган ҳайдовчи Ғ.Ш. автотранспорт эшигини очиб, ўзини автомашинадан ташлаб юборган. ЙҲХБ инспекторлари томонидан ҳайдовчига биринчи тиббий ёрдам кўрсатилиб, Оҳангарон шаҳар тиббиёт бирлашмасига етказилганда, унга «бош мия очиқ жароҳати, бош мияга қон қуйилиши оғир ҳолати, бош мия силжиши» ташхиси қўйилган.
6 июнь куни соат 23:00 ларда фуқаро Ғ.Ш. Тошкент шаҳрида жойлашган 39-сонли шифохонада кўрсатилган тиббий муолажаларга қарамасдан вафот этган. Ҳолат юзасидан прокуратура органлари томонидан текширув ўтказилмоқда.
ИИВ вакили ушбу ҳайдовчи ЙҲХБ ходимлари томонидан калтаклангани тўғрисида ижтимоий тармоқларда тарқалган хабарлар ёлғонлигини ҳам билдириб ўтган.
«Ижтимоий тармоқ фаолларидан ҳолат тўлиқ ўрганилиб, вазиятга ҳуқуқий баҳо берилмагунга қадар, ‘ҳайдовчи аёвсиз калтакланган’ каби ёлғон маълумотларни тарқатмаслигини сўраймиз. Ёлғон шов-шув кўтариш ортидан каналингизга ‘подписчик’ йиғишни бошқа вақтга қолдиринг», — деб ёзади Ғиёсов.
Аввалроқ Самарқандда чет эл фуқароларига электрошокер қўллаш билан боғлиқ воқеадан сўнг 4 нафар ходим тизимдан бўшатилгани, Андижонда уч нафар шахс ЙПХ ходими билан жанжаллашиб, рацияси, нишони ва планшетини олиб қўйгани, Чироқчида ЙПХ ходимларига қаршилик кўрсатган шахслар ҳибсга олингани тўғрисида хабар берилганди.
Изоҳ (0)