Бухорода 2 нафар фарзанди таъминоти учун 81 миллион 766 минг сўм миқдоридаги алимент қарздорлигини тўлашдан бўйин товлаб келган фуқаро 15 суткага қамалди. Бу ҳақда «Дарё»га вилоят МИБ матбуот хизмати раҳбари Ихтиёр Олимов хабар берди.
Таъкидланишича, бюронинг Қоракўл тумани иш юритувига ундирувчи Д.Х. томонидан икки нафар фарзанди таъминоти учун қарздор Н.С.нинг алимент тўловини амалга оширмай келаётгани юзасидан мурожаат келиб тушган. Ижро ҳаракатлари давомида қарздор Н.С. ижро ҳужжатлари талабларини бажармай, яшириниб юрган. Шундан сўнг 2020 йилнинг февраль ойида Н.С.га нисбатан қидирув эълон қилинган.
Олиб борилган қидирув тадбирлари натижасида қарздор Н.С.нинг Тошкент вилоятидаги яқин қариндошининг уйида ишлаб, яшаб юргани аниқланган ва қўлга олинган.
Н.С.нинг алимент қарздорлиги қайта ҳисобланганда, 81 миллион 766 минг сўмни ташкил этган. Ўз вақтида қарзини тўламай, яшириниб юргани сабабли унга нисбатан Маъмурий жавобгарлик тўғрисидаги кодекснинг 471-моддаси (ота-она қарамоғидан маҳрум бўлган болалар тўғрисидаги маълумотларни васийлик ва ҳомийлик органига хабар қилмаслик) билан маъмурий баённома расмийлаштирилган ва тўпланган ҳужжатлар Жиноят ишлари бўйича Қоракўл тумани судига юборилган.
Икки йил давомида алимент тўловидан бўйин товлаб, яшириниб юрган фуқаро 26 май куни 15 суткага қамалган. «15 сутка маъмурий қамоқ жазоси фуқарони алимент қарздорлигини тўлашдан озод этмайди», — деди Ихтиёр Олимов.
Изоҳ (0)