Андижонда ноқонуний йўл билан ер сотмоқчи бўлган фирибгарлар ушланди, деб хабар бермоқда вилоят Ички ишлар бошқармаси.
Қайд этилишича, 1 июнь куни Андижон вилояти ИИБ ва прокуратураси ходимлари томонидан тезкор тадбир ўтказилган. Унда аниқланишича, Шаҳрихон туманида яшовчи Т.А. ва таниши, Шаҳрихон туманида яшовчи Ш.И. Андижон—Шаҳрихон йўлининг 4-километрида жойлашган боғдорчилик учун ажратилган 80 сотих ер майдонини сотишни мақсад қилган. Алдов йўли билан 1 гектар деб интернет тармоғига эълон бериб, эълон асосида мурожаат қилган харидор Э.Р.га 45 минг долларга сотмоқчи бўлган.
Олиб борилган тезкор тадбирлар давомида улар Шаҳрихон туманида жойлашган ошхоналарнинг бирида холис харидорга олдиндан келишилган пул ҳисобидан 400 миллион сўм миқдоридаги пулларни олган вақтида тадбир иштирокчилари томонидан ашёвий далиллар билан ушланган.
Ҳолат юзасидан Жиноят кодексининг 168-моддаси 4-қисми «а» банди (жуда кўп миқдорда фирибгарлик) билан жиноят иши қўзғатилган. Ҳозирда тергов ҳаракатлари олиб борилмоқда.
Изоҳ (0)