Toshkent viloyatining Ohangaron tumanida YHXB inspektori tomonidan mashinasi jarima maydoniga olib ketilayotgan vaqtda haydovchi avtomobildan o‘zini tashlab yubordi. Bu haqda IIV matbuot kotibi Shohrux G‘iyosov ma’lum qildi.
Ma’lum qilinishicha, 20-may kuni tumanning “O‘zar” qishlog‘i hududidan o‘tgan Nurafshon—Ohangaron avtomobil yo‘lining 52 kilometrida “VAZ-2121” rusumli avtomashina YHXB inspektorlari tomonidan tekshirish uchun to‘xtatilganida, 27 yoshli haydovchi G‘.Sh.ning avtotransport boshqarish uchun me’yoriy hujjatlari yo‘qligi aniqlangan.
Haydovchiga nisbatan Ma’muriy javobgarlik to‘g‘risidagi kodeksning 135-moddasi (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) 1-qismi bilan elektron ma’muriy bayonnoma rasmiylashtirilgan. Avtomashinani vaqtinchalik jarima maydoniga joylashtirish uchun YHXB inspektori boshqaruvida harakatlanib ketayotganida, avtotransport old o‘rindig‘ida o‘tirgan haydovchi G‘.Sh. avtotransport eshigini ochib, o‘zini avtomashinadan tashlab yuborgan. YHXB inspektorlari tomonidan haydovchiga birinchi tibbiy yordam ko‘rsatilib, Ohangaron shahar tibbiyot birlashmasiga yetkazilganda, unga “bosh miya ochiq jarohati, bosh miyaga qon quyilishi og‘ir holati, bosh miya siljishi” tashxisi qo‘yilgan.
6-iyun kuni soat 23:00 larda fuqaro G‘.Sh. Toshkent shahrida joylashgan 39-sonli shifoxonada ko‘rsatilgan tibbiy muolajalarga qaramasdan vafot etgan. Holat yuzasidan prokuratura organlari tomonidan tekshiruv o‘tkazilmoqda.
IIV vakili ushbu haydovchi YHXB xodimlari tomonidan kaltaklangani to‘g‘risida ijtimoiy tarmoqlarda tarqalgan xabarlar yolg‘onligini ham bildirib o‘tgan.
“Ijtimoiy tarmoq faollaridan holat to‘liq o‘rganilib, vaziyatga huquqiy baho berilmagunga qadar, ‘haydovchi ayovsiz kaltaklangan’ kabi yolg‘on ma’lumotlarni tarqatmasligini so‘raymiz. Yolg‘on shov-shuv ko‘tarish ortidan kanalingizga ‘podpischik’ yig‘ishni boshqa vaqtga qoldiring”, — deb yozadi G‘iyosov.
Avvalroq Samarqandda chet el fuqarolariga elektroshoker qo‘llash bilan bog‘liq voqeadan so‘ng 4 nafar xodim tizimdan bo‘shatilgani, Andijonda uch nafar shaxs YPX xodimi bilan janjallashib, ratsiyasi, nishoni va planshetini olib qo‘ygani, Chiroqchida YPX xodimlariga qarshilik ko‘rsatgan shaxslar hibsga olingani to‘g‘risida xabar berilgandi.
Izoh (0)