Samarqandda IIB xodimi pogonini o‘zi yulib, bunda yonidagi ayolni ayblagani ko‘ringan video tarqaldi. Vazirlik holat o‘rganilayotganini ma’lum qildi

Ijtimoiy tarmoqlarda IIB xodimi o‘z pogonini o‘zi yulib olib, bunda yonida bo‘lgan ayolni ayblagani aks etgan video tarqaldi. Ichki ishlar vazirligi holat o‘rganilayotganini, tez orada batafsil ma’lumot berilishini ma’lum qildi.

“2021-yilning 16-iyun kuni Samarqand viloyati Qo‘shrabot tumani prokuraturasi binosida, fuqaro va ichki ishlar organi xodimi o‘rtasida sodir bo‘lgan ziddiyatli videotasvir O‘zbekiston Respublikasi IIV Shaxsiy xavfsizlik xizmati tomonidan o‘rganilmoqda”, — deyiladi vazirlik axborot xizmati rahbari Shohrux G‘iyosovning Telegram-kanalida tarqatilgan axborotda.

Mas’ulning yozishicha, xodimning harakatlari qo‘shimcha ravishda to‘liq tekshirilib, holatga huquqiy baho beriladi.

Videoni tarqatgan manbaning yozishicha, 1976-yilda tug‘ilgan ayol SH.J. Jinoyat ishlari bo‘yicha Ishtixon tuman sudi sudyasi K.Pansatov tomonidan Jinoyat kodeksining 219-moddasi 1-qismi (hokimiyat vakili yoki fuqarolik burchini bajaruvchi shaxsga qarshilik ko‘rsatish) bilan aybdor deb topilgan va unga chora ko‘rilgan.