Леброн Жеймс миллиардер спортчилар қаторидан жой олди

«Лейкерс» баскетбол жамоаси ҳужумчиси Леброн Жеймс миллиардерга айланди.

Forbes маълумотларига кўра, 37 ёшли баскетболчи 2021 йилда 121,2 миллион доллар ишлаб топган ва умумий бойлиги 1 миллиард долларга етган.

NBA’нинг 19 мавсумида атиги тўртинчи марта плей-офф босқичини ўтказиб юборган Жеймс лигада ҳозир фаолиятини олиб бораётган ўйинчилар ичида илк миллиардерга айланди.

Баскетболчилар ичида Майкл Жордан 2014 йилда, фаолиятини якунлаганидан 11 йил ўтиб, миллиардерга айланганди.

2014 йилда ГҚ нашрига берган интервьюсида Леброн асосий мақсадларидан бири миллиардер бўлиш эканини тан олганди.

«Шубҳасиз, мен ўз бизнесимни максимал даражада оширишни хоҳлайман. Агар бу натижага эришсам, миллиардер спортчига айланаман — гип-гип-ура! Жуда хурсанд бўлардим», — деганди баскетболчи.

Жеймс NBA’нинг 4 карра ғолиби ва 2 карра Олимпия ўйинлари чемпиони ҳисобланади.

2020 йилда Криштиану Роналду футболчилар орасида илк миллиардерга айланганди.