«Реал»да дастлабки трансфер: Антонио Рюдигер «Челси»ни тарк этиб, Мадридга кўчиб ўтди

«Челси»нинг собиқ футболчиси Антонио Рюдигер эркин агент сифатида «Реал» сафига қўшилди.

Мадрид жамоаси марказий ҳимоячи билан келишувга эришганини маълум қилди. Рюдигер «қаймоқранглилар» билан 2026 йилнинг ёзига қадар мўлжалланган шартнома имзолади.

Антонио фаолияти давомида «Штутгарт», «Рома» каби жамоаларда тўп сурган. 2017—2022 йиллар давомида «Челси» шарафини ҳимоя қилган. Лондонликлар сафида 203 та ўйинда иштирок этиб, 12 та голга муаллифлик қилган. Немис футболчиси «аристократлар» билан Чемпионлар Лигаси, Европа Лигаси, Англия Кубоги, Европа Суперкубоги ва клублар ўртасидаги Жаҳон чемпионати совринларини қўлга киритган.

29 ёшли ҳимоячи 2021/22 йилги мавсум «Челси» сафида барча мусобақаларда 48 та ўйинда иштирок этиб, 5 та гол ва 2 та голли узатмани амалга оширди.

Аввалроқ Марсело, Иско ва Гарет Бэйл «Реал»ни эркин агент сифатида тарк этаётгани маълум қилинганди.