Нигерияда маймунчечак сабаб ёввойи ҳайвонларнинг гўштини сотиш тақиқланди

Нигерия ҳукумати мамлакатда маймунчечак тарқалишини тўхтатиш учун эҳтиёт чораси сифатида ёввойи ҳайвон гўштини сотишни тақиқлади. Бу ҳақда Africanews хабар берди.

Қишлоқ хўжалигини ривожлантириш вазири Муҳаммад Абубакар мамлакатдаги ёввойи ҳайвонлар гўштини сотувчи савдогарлар ва овчиларга бу фаолиятни тўхтатишни буюрди. Шунингдек, нигерияликларни маймунчечак билан касалланишда гумон қилинаётган одамлар билан мулоқот қилмасликка чақирди.

«Нигерияда патоген тарқалишининг ҳар қандай эҳтимолини олдини олиш учун овчилар ва ёввойи ҳайвон гўштини сотувчилар ушбу амалиётни дарҳол тўхтатиши зарур», — дейилади баёнотда.

Шунингдек, Абубакарнинг таъкидлашича, вазирлик Нигерия касалликларни назорат қилиш маркази (NCDC) ва Ягона соғлиқни сақлаш жамоаси таркибидаги бошқа манфаатдор томонлар билан биргаликда вазиятни ушлаб туриш ва назорат қилишни таъминлаш устида ишламоқда.

Қишлоқ хўжалиги вазирлиги ветеринария шифокорлари ва бошқа ходимларда маймунчечакнинг эҳтимолий ҳолатларини аниқлаш учун назоратни кучайтиришни буюрди. Ҳайвонот боғлари, истироҳат боғлари, қўриқхоналар ва дам олиш масканлари операторларига ҳайвонлар ва одамлар ўртасидаги контактга йўл қўйилмаслик ҳақида эслатилди.

Таъкидлаш жоизки, Нигерия ва Африканинг аксарият ҳудудларида ёввойи ҳайвон гўшти тансиқ таом ҳисобланади. Бу истеъмол учун овланган ҳар қандай ёввойи ҳайвонларга, жумладан, антилопалар, шимпанзелар, кўршапалаклар, каламушлар, кирпилар ва илонларга тегишли.

Аввалроқ швейсариялик олим маймунчечак билан касалланиш ҳолатларининг кўпайиши эпидемия бошланишидан дарак бериши мумкинлигини айтганди. Май охирида Нигерияда маймунчечакдан биринчи ўлим қайд этилган.

Маймунчечак касаллиги ҳайвонлардан одамларга юқадиган ноёб вирусли зооноз касалликдир, у илк бор 1970 йилларда Конго Демократик Республикасида қайд этилган. Аломатлари иситма ва бош оғриғи бўлиб, юзда тери тошмаси бошланади ва тананинг қолган қисмига тарқалади.

Касалликнинг белгилари енгил ёки оғир бўлиши, зарарли ҳолатда қичимали ва оғриқли кечиши мумкин. Касалликни юқтиришнинг маълум омиллари ов пайтида ҳайвонлар билан контактда бўлиш ва ёввойи ҳайвонларнинг гўштини истеъмол қилишдир.

Июнь бошида Жаҳон соғлиқни сақлаш ташкилоти дунёнинг 30 та мамлакатдаги одамлар орасида маймунчечак билан касалланиш бўйича 550 дан ортиқ ҳолатни қайд этди.