Россия босқини оқибатида Чернобил АЭС юзлаб компьютер ва машиналаридан айрилди. Улар ўғирлаб кетилган ёки йўқ қилинган

Россия ҳарбийлари Чернобил атом электр станцияси (АЭС)га 135 миллион доллардан ортиқ ҳажмда зарар етказди. Бу ҳақда The Washington Post газетаси Украинанинг зонани бошқариш бўйича давлат агентлиги раҳбари Евгений Крамаренкога таяниб хабар бермоқда, деб ёзади Meduza.

Мақолада даъво қилинишича, россияликлар томонидан 698 та компьютер, 344 та машина, 1500 та дозиметр, шунингдек, зонада ўрмон ёнғинларига қарши кураш учун зарур бўлган ўт ўчириш қурилмаларининг деярли барчаси ўғирлаб кетилган ёки йўқ қилинган.

Евгений Крамаренконинг сўзларига кўра, ўғирланган ускуналарнинг бир қисми GPS-датчиклар билан жиҳозланган бўлиб, улар ўзининг жойлашган жойи ҳақида маълумот узатишда давом этмоқда. Ушбу маълумотларга кўра, ускуналар Беларусь ҳудудида турибди.

The Washington Post, шунингдек, станциянинг тўққиз ходими ўлдирилгани ва беш киши ўғирлаб кетилгани ҳақида ёзмоқда. Мақолада воқеалар тафсилотлари келтирилмаган. Аввалроқ объектни қўриқлаётган Миллий гвардия ходимлари ўғирлаб кетилгани хабар берилганди.

Россия қўшинлари Чернобил АЭСни урушнинг биринчи куни эгаллаб олганди. Ўша пайти станцияда бўлган ходимлар бир неча ҳафта сменасиз ишлашга мажбур бўлган. Март охирида Россия қўшинлари Украина шимолидаги ҳудуддан чекинди.

Май охирида Украина бош прокурори Ирина Венедиктова Росгвардия генерал майори Олег Якушевга қарши жиноят иши ҳақида маълум қилди. У Россия қўшинларига Чернобил АЭСдан «станоклар, ускуналар ва офис техникасидан тортиб мебель ва кийим-кечаккача» бўлган «2000 донадан ортиқ мол-мулкни» ўғирлаб кетишни буюрган. Ўмарилган буюмлар қийматини тергов 26 миллион гривна (тахминан 880 минг доллар)га баҳолади.

Россия ҳукумати Украинанинг босиб олинган ҳудудларида амалга оширилган жиноятлар ҳақидаги хабарларни бутунлай рад этмоқда. Гувоҳларнинг гаплари, фото ва видеоматериалларни Россияда сохтакорлик ёки иғвогарлик деб аташмоқда.