Қирғизистонда собиқ президент Атамбаевнинг қароргоҳи мусодара қилинди

Қирғизистон собиқ президенти Алмазбек Атамбаевнинг Қўй-Тош қишлоғидаги қароргоҳи давлат фойдасига мусодара қилинди, деб хабар беради «Интерфакс» Давлат мол-мулкини бошқариш фондига таяниб.

«Чуй вилоятининг Оламуддин тумани Қўй-Тош қишлоғида жойлашган 2,7 гектар ер майдонидаги Алмазбек Атамбаевга тегишли уй мусодара қилинди ва давлат мулкига қабул қилинди», — деди фонд вакили.

Унинг сўзларига кўра, 30 май куни Давлат мол-мулкини бошқариш фонди ходимлари ер-мулкни текшириш ва инвентаризация қилиш учун у ерга борган. «Текширув чоғида объектда мебель ва инвентар борлиги, гаражда автотранспорт воситалари тургани аниқланди. Атамбаевнинг вакилларига уч кун муддат ичида иншоотни бўшатиш таклиф қилинди», — деди агентлик суҳбатдоши.

Унинг айтишича, давлат мулкидан оқилона фойдаланиш мақсадларида вазирлар маҳкамаси буйруғи лойиҳаси ишлаб чиқилган бўлиб, унга мувофиқ, ушбу мажмуа асосида «кекса фуқаролар учун ижтимоий стационар муассаса» очиш таклиф этилмоқда.

Шу билан бирга, Атамбаев тарафдорларининг партияси — «Социал-демократлар» раиси Темирлан Султанбеков Қўй-Тошдаги қароргоҳда собиқ президентлар Аскар Акаев, Курманбек Бакиев ва Сўронбай Жееенбековнинг уруғ-аймоқчилик режимлари жиноятлари хотирасига бағишланган музей ҳамда болалар учун таълим-соғломлаштириш мажмуасини очиш режалаштирилаётганини маълум қилди.

«Давлат мол-мулкини бошқариш фонди ходимлари жазолаш таҳдидлари билан объект ҳудудига кириб борган, натижада собиқ президентнинг у ерда яшаётган оиласини, шунингдек, таълим-соғломлаштириш мажмуаси тарбиячилари ва музей ходимлари жуда қўрқиб кетган. Атамбаевнинг рафиқаси Раиса Атамбаева ҳуқуқ-тартибот органларига мурожаат қилиб, жиноят иши очишни сўради», — деди Султанбеков.

Атамбаевнинг адвокати Замир Жоошев аниқлик киритишича, Давлат мол-мулкини бошқариш фонди ходимлари ер-мулк мусодара қилинишини тасдиқловчи ҳеч қандай ҳужжатларни тақдим этмаган. «Давлат мол-мулкини бошқариш фонди раиси ўринбосари Канат Рискулов Алмазбек Атамбаевнинг уйини уч кун ичида бўшатиш ҳақида асоссиз ультиматум қўйди. Шу билан бирга у бу собиқ президент ёки оиласининг уйи эмас, балки соғломлаштириш маркази деб даъво қилмоқда. Уйдан у ерда яшовчи Атамбаев оиласи аъзоларини кўчириш ҳақидаги суд қароридан ташқари ҳеч қандай ҳужжатларни тақдим этишгани йўқ», — деди Жоошев.

Аввалроқ Алмазбек Атамбаевга янги айбловлар қўйилгани, у 2010 йилнинг июнида юз берган тўқнашувлар бўйича жиноий ишда айбланаётгани хабар берилганди.

Атамбаев иши

2020 йил октябрида мухолифат тарафдорларининг хавфсизлик кучлари билан тўқнашувидан кейин (бунинг натижасида мамлакат президенти Сўронбай Жээнбеков истеъфо берганди) бир нечта маҳбуслар, шу жумладан, Атамбаев ҳам озод этилганди. Бир неча кундан кейин у Бишкек марказида оммавий тартибсизликларни уюштириш айблови билан яна қўлга олинганди.

2020 йил 23 июнда Бишкекнинг Первомай тумани суди Атамбаевни 2013 йилда жиноий авторитет Азиз Батукаевни ноқонуний озод этганлик ҳақидаги иш бўйича мол-мулкини мусодара қилиш билан 11 йил-у 2 ойга озодликдан маҳрум этган. 2020 йил 14 августда Бишкек шаҳар суди биринчи инстанция ҳукмини ўзгаришсиз қолдирган. 15 мартда Қирғизистон Олий суди ушбу судлар қарорини тасдиқлади.