Хитойнинг Шанхай шаҳрида март охиридан буён давом этиб келган қатъий карантиндан кейин 1 июнь, чоршанба куни одамлар яна кўчаларга чиқди, метро линиялари ва дўконлар ишга тушди, деб ёзади «Интерфакс».
«Шанхайда икки ойлик карантиндан кейин одатий ҳаётга қайтишга қўйилган илк қадамлар сифатида COVID-19 билан боғлиқ бир қатор чекловлар юмшатилди», — дейилади The Guardian газетаси хабарида.
Ижтимоий тармоқларга жойланган лавҳаларда Шанхай аҳолиси вақт ярим тундан ўтиши билан ўйин-кулги, хурсандчилик билан чекловлар бекор қилинишини нишонлашни бошлаганини кўриш мумкин.
1 июнь ҳолатига кўра, Шанхайда бор-йўғи 15 кишида касаллик аниқланган, апрель ойида эса суткалик кўрсаткич 20 мингтани ташкил қилганди.
Шу билан бирга, коронавирусга тести мусбат чиққан одамлар ва улар билан бевосита алоқада бўлганларнинг барчаси карантинда қолиши керак бўлади. Шунингдек, шаҳар аҳолиси жамоат транспортидан фойдаланиш ёки оммавий тадбирларда қатнашиш учун ҳар 72 соатда коронавирусга тест топшириши керак.
Хитой COVID-19 га «нол чидамлилик» сиёсатига амал қилади. Бу вирус тарқалишини локдаунлар ва касалланганлар билан мулоқотда бўлганлар учун мажбурий карантин орқали чеклашни англатади.
Пандемия бошидан буён Хитойда коронавирус билан касалланиш бўйича 224 мингдан ортиқ ҳолат ва 5,2 мингта ўлим ҳолати қайд этилган.
Таъкидлаш жоиз, қатор мамлакатлар COVID-19 билан боғлиқ чекловларни бекор қилмоқда. Хусусан, Туркияда касалланиш даражаси пасайгани сабабли дастлаб ниқоб тақиш мажбурияти олиб ташланди, 1 июндан бошлаб эса мамлакатга кириш учун сайёҳлардан ПЗР-тести ёки тезкор антиген тестининг салбий натижаларини кўрсатиш талаб этилмайдиган бўлди.
Таиланд 1 июндан бошлаб барча мамлакатлардан келган сайёҳлар учун мажбурий карантин талабини бекор қилди. Шу вақтга қадар хорижлик сайёҳлар Таиландга кирганидан сўнг икки ҳафтагача карантин остида бўларди.
Кипр ҳам 1 июндан сайёҳлар учун барча чекловларни бекор қилди. Саёҳатчилар энди эмланганлик ҳақидаги маълумотномани, ПЗР-тест ёки экспресс тестнинг манфий натижасини тақдим этиши шарт эмас.
Изоҳ (0)