Qirg‘izistonda sobiq prezident Atambayevning qarorgohi musodara qilindi

Qirg‘iziston sobiq prezidenti Almazbek Atambayevning Qo‘y-Tosh qishlog‘idagi qarorgohi davlat foydasiga musodara qilindi, deb xabar beradi “Interfaks” Davlat mol-mulkini boshqarish fondiga tayanib.

“Chuy viloyatining Olamuddin tumani Qo‘y-Tosh qishlog‘ida joylashgan 2,7 gektar yer maydonidagi Almazbek Atambayevga tegishli uy musodara qilindi va davlat mulkiga qabul qilindi”, — dedi fond vakili.

Uning so‘zlariga ko‘ra, 30-may kuni Davlat mol-mulkini boshqarish fondi xodimlari yer-mulkni tekshirish va inventarizatsiya qilish uchun u yerga borgan. “Tekshiruv chog‘ida obyektda mebel va inventar borligi, garajda avtotransport vositalari turgani aniqlandi. Atambayevning vakillariga uch kun muddat ichida inshootni bo‘shatish taklif qilindi”, — dedi agentlik suhbatdoshi.

Uning aytishicha, davlat mulkidan oqilona foydalanish maqsadlarida vazirlar mahkamasi buyrug‘i loyihasi ishlab chiqilgan bo‘lib, unga muvofiq, ushbu majmua asosida “keksa fuqarolar uchun ijtimoiy statsionar muassasa” ochish taklif etilmoqda.

Shu bilan birga, Atambayev tarafdorlarining partiyasi — “Sotsial-demokratlar” raisi Temirlan Sultanbekov Qo‘y-Toshdagi qarorgohda sobiq prezidentlar Askar Akayev, Kurmanbek Bakiyev va So‘ronbay Jeeenbekovning urug‘-aymoqchilik rejimlari jinoyatlari xotirasiga bag‘ishlangan muzey hamda bolalar uchun ta’lim-sog‘lomlashtirish majmuasini ochish rejalashtirilayotganini ma’lum qildi.

“Davlat mol-mulkini boshqarish fondi xodimlari jazolash tahdidlari bilan obyekt hududiga kirib borgan, natijada sobiq prezidentning u yerda yashayotgan oilasini, shuningdek, ta’lim-sog‘lomlashtirish majmuasi tarbiyachilari va muzey xodimlari juda qo‘rqib ketgan. Atambayevning rafiqasi Raisa Atambayeva huquq-tartibot organlariga murojaat qilib, jinoyat ishi ochishni so‘radi”, — dedi Sultanbekov.

Atambayevning advokati Zamir Jooshev aniqlik kiritishicha, Davlat mol-mulkini boshqarish fondi xodimlari yer-mulk musodara qilinishini tasdiqlovchi hech qanday hujjatlarni taqdim etmagan. “Davlat mol-mulkini boshqarish fondi raisi o‘rinbosari Kanat Riskulov Almazbek Atambayevning uyini uch kun ichida bo‘shatish haqida asossiz ultimatum qo‘ydi. Shu bilan birga u bu sobiq prezident yoki oilasining uyi emas, balki sog‘lomlashtirish markazi deb da’vo qilmoqda. Uydan u yerda yashovchi Atambayev oilasi a’zolarini ko‘chirish haqidagi sud qaroridan tashqari hech qanday hujjatlarni taqdim etishgani yo‘q”, — dedi Jooshev.

Avvalroq Almazbek Atambayevga yangi ayblovlar qo‘yilgani, u 2010-yilning iyunida yuz bergan to‘qnashuvlar bo‘yicha jinoiy ishda ayblanayotgani xabar berilgandi.

Atambayev ishi

2020-yil oktabrida muxolifat tarafdorlarining xavfsizlik kuchlari bilan to‘qnashuvidan keyin (buning natijasida mamlakat prezidenti So‘ronbay Jeenbekov iste’fo bergandi) bir nechta mahbuslar, shu jumladan, Atambayev ham ozod etilgandi. Bir necha kundan keyin u Bishkek markazida ommaviy tartibsizliklarni uyushtirish ayblovi bilan yana qo‘lga olingandi.

2020-yil 23-iyunda Bishkekning Pervomay tumani sudi Atambayevni 2013-yilda jinoiy avtoritet Aziz Batukayevni noqonuniy ozod etganlik haqidagi ish bo‘yicha mol-mulkini musodara qilish bilan 11 yil-u 2 oyga ozodlikdan mahrum etgan. 2020-yil 14-avgustda Bishkek shahar sudi birinchi instansiya hukmini o‘zgarishsiz qoldirgan. 15-martda Qirg‘iziston Oliy sudi ushbu sudlar qarorini tasdiqladi.