Бугун,

  • USD 11014.01
  • RUB 191.8
  • EUR 10674.78

Жанубий Осетия президенти Алан Гаглоев 2022 йил 17 июль куни Россия билан бирлашиш ҳақида референдум ўтказилишини кўзда тутувчи фармон амал қилишини тўхтатиб қўйди, деб ёзади Meduza.

Фото: «ТАСС»

Фото: «ТАСС»

«РБК» хабарига кўра, ҳужжатнинг амал қилиши Россия билан барча маслаҳатлашувлар якунлангунига қадар тўхтатиб қўйилган.

Жанубий Осетия президенти сайтида маълум қилишича, Гаглоев «референдумга чиқариладиган масаланинг ҳуқуқий оқибатлари ноаниқлигини ҳисобга олган ҳолда» «Россия Федерацияси қонуний ҳуқуқ ва манфаатларига тааллуқли масалалар бўйича референдумни бир томонлама ҳал қилиб бўлмаслигини тан олган» ва «Жанубий Осетия фуқароларининг Россия билан интеграция ҳақидаги ташаббусини тўлиқ қўллаб-қувватлаган ҳолда» фармон амал қилишини тўхтатган.

Жанубий Осетия президенти «Жанубий Осетия Республикаси ва Россия Федерациясининг бундан кейинги интеграциялашуви билан боғлиқ барча саволлар мажмуи бўйича Россия томони билан зудлик билан маслаҳатлашувлар ўтказиш»ни топширди.

Жанубий Осетиянинг Россияга қўшилиши ҳақидаги референдумни республиканинг аввалги президенти Анатолий Бибилов белгилаган эди. У тегишли фармонни 13 май куни — президент сайловида Гаглоевга мағлуб бўлганидан кейин имзолаганди.

Кремль май ойи охирида референдумни ташкиллаштиришда иштирок этмаётганини маълум қилиб, ундаги саволларни қандай тузиш ҳақида ўйлаб кўришни таклиф этганди.

Дунё мамлакатларининг кўпчилиги Жанубий Осетия мустақиллигини ҳам, унинг президенти сайловлари натижаларини ҳам тан олмайди.

Жанубий Осетия президенти Анатолий Бибилов ҳудуднинг Россияга қўшилиши ҳақидаги режалар ҳақида 30 март куни эълон қилганди. У Шимолий Осетия билан бир ҳудудга бирлашиш таклифини берган. Апрелда Жанубий Осетияда президентлик сайловлари ўтказилган ва 56,09 фоиз олган Алан Гаглоев ғалабага эришган. Гаглоев Россияга қўшилиш бўйича референдумни кечиктириш ҳақида гапирган. Бироқ Бибилов умумхалқ муҳокамасини 17 июлга кўчиришга қарор қилди.

Изоҳ
Асосий янгиликлар