Туркия президенти Ражаб Тоййиб Эрдўғон ўлгунича мамлакатдаги тарафдорлари билан қолиш ниятида эканини айтди. Бу ҳақда у Истанбул фатҳ этилишининг 569 йиллиги муносабати билан ўтказилган митингда айтиб ўтди. Шу тариқа Эрдўғон мухолифатчи сиёсатчиларнинг Туркия президенти республикадан қочиб кетишни режалаштираётгани ҳақидаги даъволарига жавоб қайтарди.
«Биз сўнгги нафасимизгача шу ерда бўламиз. Улар Тойиб Эрдўғон мамлакатдан қочиб кетадиган одам, деб ўйламоқда. Лекин мана, Эрдўғон Атакйўйда (Истанбулдаги туман — таҳр). Ўлгунимизча шу ердамиз», — деди у.
25 май куни мухолифатдаги Туркия Халқ партияси етакчиси Камол Қиличдорўғли Эрдўғонлар оиласини АҚШга миллионлаб доллар олиб чиқиб кетганликда айблади. У, шунингдек, Эрдўғоннинг мамлакатдан қочиш режасини оммага фош қилишга ваъда берди.
Туркияда 2021 йил президентлик сайловлари ўтказилиши режалаштирилган. Туркиянинг СОНАР тадқиқот ташкилоти маълумотларига кўра, 2022 йил май ҳолатига кўра, амалдаги президентнинг рейтинги 34,8 фоизни ташкил қилади. Қиличдарўғлининг рейтинги эса — 3,5 фоиз.
Эрдўғон Швеция ва Финляндия делегациялари билан НАТО масаласи бўйича музокаралардан норозилигини ҳам билдирди. Эрдўғон Хелсинки ва Стокгольмни «инсофсизлик ва носамимийлик» учун қоралади.
«Афсуски, делегациялар учрашуви биз кутган даражада бўлмади», — дея Эрдўғоннинг сўзларини келтирмоқда TRT.
Туркия президенти учрашувни бошқа даражада ўтказишга умид қилаётганини айтди. Эрдўғоннинг қайд этишича, у Туркия президенти бўлиб турган экан, мамлакат терроризмни қўллаб-қувватловчи давлатларнинг НАТОга киришига «ҳа» дея олмайди.
Аввалроқ НАТО бош котиби Йенс Столтенберг Швеция ва Финляндия Туркиянинг талабларини бажармаса, НАТОга аъзолик учун номзод бўлиши даргумон эканини айтганди.
18 май куни Швеция ва Финляндия НАТОга аъзо бўлиш учун ариза топширган. Бу давлатлар расмийларининг қарори Украинада Россия босқини бошланганидан кейин хавфсизлик соҳасидаги ўзгаришлар билан изоҳланган. Улар ушбу қарор Россияга қарши қаратилмаганини ва фақат ўз хавфсизлигини таъминлаш мақсадида қабул қилинганини таъкидлади.
Изоҳ (0)