АҚШ ҳукумати ўқлари Россия ҳудудига бориб етиши мумкин бўлган баравар ўт очиш реактив тизимларини етказиб бермайди. Бу ҳақда Америка президенти Жо Байден маълум қилди, деб ёзади Meduza. Байден айнан қандай баравар ўт очиш реактив тизимларини назарда тутгани номаълум.
The Washington Post юқори мансабли амалдорга таяниб маълум қилишича, АҚШ маъмурияти Украинага баравар ўт очиш реактив тизимларини етказиб беришни истисно қилмаяпти, аммо катта масофали ракеталарни бериш варианти кўриб чиқилмаяпти. Нашр қайд этишича, бундан келиб чиқиб айтиш мумкинки, Вашингтон Киевга M270 MLRS пуск қурилмаларини бериши мумкин, фақат кичик масофали ракеталар билан бирга.
Россия Хавфсизлик кенгаши раиси ўринбосари Дмитрий Медведев Байденнинг баёнотини мантиқли деб атади. «Акс ҳолда бизнинг шаҳарларимизга ҳужум қилинган тақдирда Россия Қуролли кучлари ўз таҳдидини амалга ошириб, бу жиноий қарорларни қабул қилган марказларга зарбалар берган бўларди», — деб ёзди у Telegram’да.
Аввалроқ АҚШ Украинани агар у Россия ҳудудига зарбалар берса, бу ҳарбий низо кучайиб кетишига олиб келиши мумкинлиги ҳақида огоҳлантирганди.
АҚШда ишлаб чиқариладиган тизимлар юзлаб километрларга ракета учиришга қодир, бу ҳозир Украинада мавжуд бўлган тизимлар қодир бўлган масофадан анча катта. Киевдагилар фикрича, уларнинг Украина томонига берилиши жанговар ҳаракатлар боришини ўзгартира олади.
Украина ҳукумати, хусусан, президент Владимир Зеленский мамлакатнинг M142 HIMARS ва M270 MLRS баравар ўт очиш тизимларига эҳтиёжи борлиги ҳақида айтган эди. Аммо Байден маъмурияти Миллий хавфсизлик кенгашида айтилган, Украина қурол-яроғдан Россия ҳудудини ўққа тутишда фойдаланиши мумкинлиги ҳақидаги хавотирлар фонида бир неча ҳафталар давомида буни рад этиб келаётганди.
Сўнгги ойларда АҚШ Украинани иттифоқчиларининг захираларидаги совет давридан қолган эски қуроллардан фойдаланадиган бир нечта баравар ўт очиш тизимлари билан таъминлади. Аммо Киев Россиянинг Донбассда олға силжишини тўхтатиш учун аниқроқ ва кучлироқ Америка тизимларини ишга солишга интилмоқда.
Уруш бошида Владимир Зеленский Ғарб давлатларини Украинани етарлича қўллаб-қувватламагани, жумладан, етарлича қурол-яроғ етказиб бермаётгани учун тез-тез қораларди. Апрель ойи охирида у мамлакат ниҳоят сўраган қурол турларини ола бошлаганини эълон қилди.
Май ойи бошида АҚШ президенти Жо Байден Украинага ҳарбий техника етказишни тезлаштириш имконини берувчи ленд-лиз дастури тўғрисидаги қонунни имзолади. Аммо бир неча кундан сўнг Украинага 40 миллиард доллар қўшимча ёрдам кўрсатиш тўғрисидаги қонун лойиҳаси Сенатдаги бир республикачи сенатор томонидан блокланди.
Изоҳ (0)