AQSH hukumati o‘qlari Rossiya hududiga borib yetishi mumkin bo‘lgan baravar o‘t ochish reaktiv tizimlarini yetkazib bermaydi. Bu haqda Amerika prezidenti Jo Bayden ma’lum qildi, deb yozadi Meduza. Bayden aynan qanday baravar o‘t ochish reaktiv tizimlarini nazarda tutgani noma’lum.
The Washington Post yuqori mansabli amaldorga tayanib ma’lum qilishicha, AQSH ma’muriyati Ukrainaga baravar o‘t ochish reaktiv tizimlarini yetkazib berishni istisno qilmayapti, ammo katta masofali raketalarni berish varianti ko‘rib chiqilmayapti. Nashr qayd etishicha, bundan kelib chiqib aytish mumkinki, Vashington Kiyevga M270 MLRS pusk qurilmalarini berishi mumkin, faqat kichik masofali raketalar bilan birga.
Rossiya Xavfsizlik kengashi raisi o‘rinbosari Dmitriy Medvedev Baydenning bayonotini mantiqli deb atadi. “Aks holda bizning shaharlarimizga hujum qilingan taqdirda Rossiya Qurolli kuchlari o‘z tahdidini amalga oshirib, bu jinoiy qarorlarni qabul qilgan markazlarga zarbalar bergan bo‘lardi”, — deb yozdi u Telegram’da.
Avvalroq AQSH Ukrainani agar u Rossiya hududiga zarbalar bersa, bu harbiy nizo kuchayib ketishiga olib kelishi mumkinligi haqida ogohlantirgandi.
AQSHda ishlab chiqariladigan tizimlar yuzlab kilometrlarga raketa uchirishga qodir, bu hozir Ukrainada mavjud bo‘lgan tizimlar qodir bo‘lgan masofadan ancha katta. Kiyevdagilar fikricha, ularning Ukraina tomoniga berilishi jangovar harakatlar borishini o‘zgartira oladi.
Ukraina hukumati, xususan, prezident Vladimir Zelenskiy mamlakatning M142 HIMARS va M270 MLRS baravar o‘t ochish tizimlariga ehtiyoji borligi haqida aytgan edi. Ammo Bayden ma’muriyati Milliy xavfsizlik kengashida aytilgan, Ukraina qurol-yarog‘dan Rossiya hududini o‘qqa tutishda foydalanishi mumkinligi haqidagi xavotirlar fonida bir necha haftalar davomida buni rad etib kelayotgandi.
So‘nggi oylarda AQSH Ukrainani ittifoqchilarining zaxiralaridagi sovet davridan qolgan eski qurollardan foydalanadigan bir nechta baravar o‘t ochish tizimlari bilan ta’minladi. Ammo Kiyev Rossiyaning Donbassda olg‘a siljishini to‘xtatish uchun aniqroq va kuchliroq Amerika tizimlarini ishga solishga intilmoqda.
Urush boshida Vladimir Zelenskiy G‘arb davlatlarini Ukrainani yetarlicha qo‘llab-quvvatlamagani, jumladan, yetarlicha qurol-yarog‘ yetkazib bermayotgani uchun tez-tez qoralardi. Aprel oyi oxirida u mamlakat nihoyat so‘ragan qurol turlarini ola boshlaganini e’lon qildi.
May oyi boshida AQSH prezidenti Jo Bayden Ukrainaga harbiy texnika yetkazishni tezlashtirish imkonini beruvchi lend-liz dasturi to‘g‘risidagi qonunni imzoladi. Ammo bir necha kundan so‘ng Ukrainaga 40 milliard dollar qo‘shimcha yordam ko‘rsatish to‘g‘risidagi qonun loyihasi Senatdagi bir respublikachi senator tomonidan bloklandi.
Izoh (0)