Зеленский Харьковга келди. Бу унинг уруш бошланганидан бери Киев вилоятидан ташқарига биринчи расмий сафари

Украина президенти Владимир Зеленский Харьков вилоятидаги украиналик ҳарбийларнинг олдинги позициялари (жанговар ҳаракатлар кетаётган ҳудуд)га ташриф буюрди. Бу ҳақда 29 май Украина президенти офиси хабар қилди.

Reuters хабарига кўра, бу Украина президентининг уруш бошланганидан бери Киев вилоятидан ташқарига биринчи расмий сафари.

«Зеленский ҳарбий хизматчиларга давлат мукофотлари ва қимматбаҳо совғалар топширди, шунингдек, Украина ҳимоячилари билан суҳбатлашди», — дейилади хабарда.

Зеленский вилоят маъмурияти раҳбари Олег Синегубов, Харьков мери Игорь Терехов ва бошқа раҳбарлар билан ҳам учрашган. Синегубовнинг айтишича, уруш мобайнида минтақада 2229 та кўп қаватли уй у ёки бу тарзда вайрон бўлган, Харьковда эса, уй жой фондининг 30 фоиздан ортиғи шикастланган.

Учрашув давомида Зеленский «бутун мамлакат бўйлаб, айниқса вайрон қилинган ҳудудлардаги панел уйларни олиб ташлаш имкониятларини кўриб чиқиш»ни ҳамда вайрон бўлган уйлар ўрнига ертўлалари ва бомба бошпаналари бор «замонавий уй жойлар» қуришни таклиф қилган.

Май ойи ўрталарида Харьков учун жангда Украина ғолиб бўлгани маълум қилинганди. Россия кучлари вилоят ҳудудидан чекинган. 24 май куни Харьковда икки ой давомида шаҳар аҳолиси учун бомба бошпанаси вазифасини ўтаган метро қайта ишга тушди.