Апрель бошидан буён дунёнинг 33 та мамлакатидаги 650 нафар болада келиб чиқиши номаълум бўлган ўткир гепатит аниқланган. Бу ҳақда Жаҳон соғлиқни сақлаш ташкилоти (ЖССТ) маълум қилди, деб ёзади «РБК».
Ушбу ҳолатларнинг кўпчилиги Европа мамлакатлари, айниқса, Буюк Британия ҳиссасига тўғри келмоқда (222 та ҳолат). ЖССТ, шунингдек, АҚШ (216), Тинч океани ғарбий қисми, жануби-шарқий Осиё ва шарқи Ўрта Ер денгизи мамлакатларидан келиб тушган маълумотларнинг бир қисмини текширмоқда.
Касалланиш ҳолатлари қайд этилган мамлакатлар орасида Аргентина, Австралия, Бельгия, Болгария, Канада, Кипр, Дания, Франция, Греция, Индонезия, Ирландия, Исроил, Италия, Япония, Мальдив, Мексика, Молдова, Нидерландия, Норвегия, Фаластин, Панама, Польша, Португалия, Жанубий Корея, Руминия, Сербия, Сингапур, Словакия, Словения, Испания ва Швеция ҳам бор. Евроиттифоқ мамлакатларида касалланиш ҳолатларининг 75 фоизи беш ёшдан кичик болалар улушига тўғри келган.
ЖССТ таъкидлашича, болаларда ўткир жигар етишмовчилиги ривожланади. Дунё бўйича барча касалланган болаларнинг 6 фоизига жигар трансплантацияси талаб қилинган, 9 киши вафот этган.
Шу билан бирга, мутахассислар касалланиш манбасини ва қўзғатувчининг юқиш усулини аниқлаганича йўқ. Улар беморларнинг бир қисмида аденовирус ва коронавирусни қайд этган. Аммо гепатит ушбу вируслардан кейин асорат сифатида юзага келиши ҳақида маълумотлар ҳозирча йўқ. ЖССТ бу гипотезани ўрганишда давом этмоқда.
Номаълум гепатит билан касалланиш бўйича илк ҳолатлар апрель бошида аниқланган эди. 5 апрелга келиб, ЖССТ марказий Шотландияда ўн нафар бола, 8 апрелга келиб эса бутун Буюк Британияда 74 та ҳолат ҳақида маълум қилган.
23 апрелда ЖССТ бир ойликдан 16 ёшгача бўлган болалар орасидаги 169 та ҳолат ҳақида хабар берди. Олимлар ҳеч бир ҳолатда гепатитнинг бизга маълум бўлган А, Б, C, Д ва Э вирусларини аниқламаган.
Изоҳ (0)