Нигериянинг Риверс штати пойтахти Порт-Харкорт шаҳридаги черков тадбири чоғида юз берган тиқилинчда 30 дан ортиқ киши ҳалок бўлди. Бу ҳақда Пунч газетаси полицияга таяниб хабар берди.
Штат полицияси вакили Грэйс Иринге-Коконинг айтишича, тадбирда черков камбағалларга ёрдам бериш учун совғалар ва озиқ-овқат тарқатмоқчи бўлган. Фожиа сабабларини аниқлаш учун тергов бошланган.
«Риверс штати полиция бошқармаси Порт-Харкортдаги янги авлод черкови томонидан уюштирилган тадбирда юз берган тиқилинчда жами 31 киши ҳалок бўлганини маълум қилди», — дейилади газета хабарида.
Эслатиб ўтамиз, 2021 йилнинг март ойида Танзания президенти Жон Магуфули билан видолашиш маросимида юзага келган оломон тиқилинчи оқибатида 45 киши ҳалок бўлиб, 37 киши жароҳат олганди.
Апрель ойида эса Исроилда диний байрам пайтида юзага келган тиқилинчда 44 киши ҳалок бўлган, яна 100 дан ортиқ одам жароҳатланган эди.
Изоҳ (0)