Ижтимоий тармоқларда Қорақалпоғистоннинг Нукус шаҳрида никоҳ тўйи маросимида гуруҳ бўлиб ҳаракатланган Lacetti машиналари бир-бири билан йўл талашиб, қўпол қоидабузарлик содир этгани ҳақида хабарлар тарқалди. Йўл ҳаракати хавфсизлиги хизмати ҳайдовчиларга нисбатан тегишли чора кўрилганини маълум қилди.
Қайд этилишича, ҳолат юзасидан суриштирув олиб борилган. Натижада Нукус шаҳри Режиссёрлар кўчасида яшовчи фуқаро А.Ж. ва Чимбой тумани Парахацҳилик кўчасида яшовчи фуқаро Б.Р. ўзларига тегишли бўлган Lacetti автомашиналарида тўй кортежида гуруҳ бўлиб ҳаракатлангани аниқланган. Улар Нукус шаҳри П.Сейтов кўчасида қўпол қоидабузарлик қилиб, бир-бири билан йўл талашиб, тўқнашиб кетган.
Ҳолат юзасидан ҳар иккала автомашина ҳайдовчиларига нисбатан Маъмурий жавобгарлик тўғрисидаги кодексининг 129-моддаси (транспорт воситалари ҳайдовчиларининг йўл ҳаракати хавфсизлигига таҳдид солувчи гуруҳ бўлиб ҳаракат қилишда қатнашиши) билан баённома расмийлаштирилган. Машиналар вақтинчалик сақлаш учун жарима майдонига қўйилган.
Бундан аввал Самарқандда тўй кортежидаги «Жигули»лар дрифт қилиб, кескин ҳаракатлангани, Сурхондарёда битирув куни акасининг Lacetti’сини ҳайдаб юрган мактаб ўқувчиси ушлангани ҳақида хабар берилган.
Изоҳ (0)