Surxondaryoda bitiruv kuni akasining Lacetti’sini haydab yurgan maktab o‘quvchisi ushlandi (video)

Surxondaryo viloyati Termiz shahrida 25-may, bitiruv kunida akasining mashinasini haydab yurgan maktab o‘quvchisi aniqlandi. Bu haqda viloyat Yo‘l harakati xavfsizligi boshqarmasi xabar qildi.

Qayd etilishicha, Termiz shahrining Islom Karimov ko‘chasida YPX xodimlari tomonidan Lacetti avtomashinasiga to‘xtash ishorasi ko‘rsatilgan. Haydovchi talabga bo‘ysunmay, to‘xtamay harakatlangan. Mashina majburiy to‘xtatilganda haydovchi voyaga yetmagan maktab o‘quvchisi ekani, mashina boshqarish huquqini beruvchi guvohnomasi yo‘qligi ma’lum bo‘lgan. Unga mashinani akasi bergani aniqlangan.

Transport vositasi vaqtincha saqlash uchun jarima maydonchasiga qo‘yilgan. Haydovchiga nisbatan ma’muriy bayonnoma rasmiylashtirilgan.