Шимолий Корея ҳарбийлари COVID-19 га қарши қўллаш учун тиббий буюмлар етишмаслигидан азият чекмоқда. Бу ҳақда Daily NK нашри хабар берди.
Шимолий Корея ҳукумати ҳарбийлар кўмагида Пхеньян ва мамлакатнинг бошқа ҳудудларига COVID-19 ни даволаш учун зарур дори-дармон етказиб бермоқда, бироқ оддий аскарлар тиббий воситаларнинг етишмаслигидан азият чекмоқда, дейилади хабарда.
Мамлакат Мудофаа вазирлиги дори воситаларини пойтахтда устувор тақсимлаш тўғрисидаги махсус фармойиш асосида Пхеньянни тиббий воситалар билан таъминлашга эътибор қаратган. Ҳарбийлар тиббий буюмлар етишмаслигидан қийналаётган бўлса-да, расмийлар Пхеньянда дори-дармонларни тўғри тақсимлаш учун қўшинларни сафарбар қилмоқда.
Пхеньянда асосий эътибор дори-дармонларни тарқатишга қаратилгани сабабли иситмаси бор ва изоляция қилинган аскарлар тегишли рецепт ва муолажани олмаган.
«Улар изоляцияда умуман муолажа олишаётгани йўқ. Изоляциядан чиққандан кейин икки кун давомида аскарларга маҳаллий ишлаб чиқарилган олтита аспирин таблеткалари ва иккита ‘Чхонсимхван’ таблеткалари берилади»,— деди манба.
Манбанинг айтишича, корпус штабининг бевосита қўмондонлиги остидаги бўлинмаларда иситмаси чиққан беморлар ташхисга мувофиқ 10 кунга казарма хонасида изоляция қилинган.
«Иситма ёки томоқ оғриғидан шикоят қилган аскарларга оддийгина ‘аскар чидаши керак’ ёки ‘бундай оғриқларга ҳам чидолмасангиз, демак ёмон инқилобчи экансиз’ каби мафкуравий сўзлар айтилади», — дея Шимолий Корея ҳарбийларидан иқтибос келтирган нашр.
Манбаларга кўра, аскарлар Пхеньян аҳолисидан ҳам оғирроқ аҳволда, чунки улар умумий турмуш тарзи, жумладан, битта казармада овқатланиш ва ухлаш туфайли гуруҳ бўлиб инфекцияга чалиниш хавфи остида.
13 май куни Шимолий Кореяда COVID-19 дан биринчи ўлим қайд этилган эди. Шунингдек, мамлакатда коронавирус билан касалланганлар сони икки миллионга яқинлашгани маълум.
Шу фонда Шимолий Корея етакчиси Ким Чен Ин Сиёсий бюронинг фавқулодда йиғилишини ўтказиб, Пхеньянда дори-дармон таъминотини барқарорлаштириш учун ҳарбийлардан фойдаланишни буюрди.
АҚШ Шимолий Кореяга коронавирусга қарши курашда ёрдам беришга тайёрлигини маълум қилганди.
Изоҳ (0)