Shimoliy Koreya harbiylari COVID-19 ga qarshi qo‘llash uchun tibbiy buyumlar yetishmasligidan aziyat chekmoqda. Bu haqda Daily NK nashri xabar berdi.
Shimoliy Koreya hukumati harbiylar ko‘magida Pxenyan va mamlakatning boshqa hududlariga COVID-19 ni davolash uchun zarur dori-darmon yetkazib bermoqda, biroq oddiy askarlar tibbiy vositalarning yetishmasligidan aziyat chekmoqda, deyiladi xabarda.
Mamlakat Mudofaa vazirligi dori vositalarini poytaxtda ustuvor taqsimlash to‘g‘risidagi maxsus farmoyish asosida Pxenyanni tibbiy vositalar bilan ta’minlashga e’tibor qaratgan. Harbiylar tibbiy buyumlar yetishmasligidan qiynalayotgan bo‘lsa-da, rasmiylar Pxenyanda dori-darmonlarni to‘g‘ri taqsimlash uchun qo‘shinlarni safarbar qilmoqda.
Pxenyanda asosiy e’tibor dori-darmonlarni tarqatishga qaratilgani sababli isitmasi bor va izolyatsiya qilingan askarlar tegishli retsept va muolajani olmagan.
“Ular izolyatsiyada umuman muolaja olishayotgani yo‘q. Izolyatsiyadan chiqqandan keyin ikki kun davomida askarlarga mahalliy ishlab chiqarilgan oltita aspirin tabletkalari va ikkita ‘Chxonsimxvan’ tabletkalari beriladi”,— dedi manba.
Manbaning aytishicha, korpus shtabining bevosita qo‘mondonligi ostidagi bo‘linmalarda isitmasi chiqqan bemorlar tashxisga muvofiq 10 kunga kazarma xonasida izolyatsiya qilingan.
“Isitma yoki tomoq og‘rig‘idan shikoyat qilgan askarlarga oddiygina ‘askar chidashi kerak’ yoki ‘bunday og‘riqlarga ham chidolmasangiz, demak yomon inqilobchi ekansiz’ kabi mafkuraviy so‘zlar aytiladi”, — deya Shimoliy Koreya harbiylaridan iqtibos keltirgan nashr.
Manbalarga ko‘ra, askarlar Pxenyan aholisidan ham og‘irroq ahvolda, chunki ular umumiy turmush tarzi, jumladan, bitta kazarmada ovqatlanish va uxlash tufayli guruh bo‘lib infeksiyaga chalinish xavfi ostida.
13-may kuni Shimoliy Koreyada COVID-19 dan birinchi o‘lim qayd etilgan edi. Shuningdek, mamlakatda koronavirus bilan kasallanganlar soni ikki millionga yaqinlashgani ma’lum.
Shu fonda Shimoliy Koreya yetakchisi Kim Chen In Siyosiy byuroning favqulodda yig‘ilishini o‘tkazib, Pxenyanda dori-darmon ta’minotini barqarorlashtirish uchun harbiylardan foydalanishni buyurdi.
AQSH Shimoliy Koreyaga koronavirusga qarshi kurashda yordam berishga tayyorligini ma’lum qilgandi.
Izoh (0)