Маск Twitter’ни сотиб олиш учун 6,25 млрд доллар йиғди

Тадбиркор Илон Маск Twitter’ни сотиб олиш учун 6,25 млрд доллар йиғди. Bloomberg маълумотларига кўра, у жами 33,5 млрд доллар сарфлашга тайёр. 

Агентлик маълумотларига кўра, тадбиркор ўзининг Tesla компаниясидаги улуши билан боғлиқ бўлган банк кредитлари ҳисобига келишувни қисман молиялаштириш режаларидан воз кечган. Айнан шу режа сабабли Tesla акциялари тушиб кетган эди.

Илон Маск Twitter’ни апрель ойи охирида сотиб олишга рози бўлди. Келишув 44 млрд долларга баҳоланди. 

Даставвал миллиардер банклардан 25,5 млрд доллар қарз олиб, яна 21 млрд долларни ўз пулидан тўлашни режалаштирган. 

13 май куни у ижтимоий тармоқдаги сохта аккаунтлар сонини текшириш зарурати туфайли битим тўхтатилганини маълум қилди. 

Кейинчалик Илон Маск ботлар сони 5 фоиздан кам бўлмагунча Twitter’ни сотиб олмаслигини айтди.