«Кинода пул йўқ». Дурдона Қурбонова машинаси ва қиммат буюмларини қайси пулига олгани ҳақида сўзлаб берди (видео)

Актриса Дурдона Қурбонова «Дарё» интернет-нашрига эксклюзив интервью берди. Интервьюни «Дарё» мухбири Феруз Муҳаммад ташкиллаштирди.

Актриса Дурдона Қурбонова бугунги кунда кино оламидаги пулсизлик муаммоси, бир кийимни бир қанча съёмкаларда кийишга мажбур бўлаётган ҳолатлари ҳақида гапириб берди.

Актрисаларда умуман пул йўқ-ку, буни ҳамма билади. Балки хонандалар тўйга чиққанлиги учун уларда пул бордир, аммо актрисаларда, кинода умуман пул йўқ.

Шоу-бизнесга, кинога пул тикаётган одамлар бу соҳаларга паст назар билан қараб, иложи борича кам пул сарфлаб, катта пулни олиш ҳаракатида бўлишади.

Сериал учун телеканаллар арзимаган пул беришади, жуда ҳам арзимаган пул. Очиқ айтадиган бўлсам, у пул режиссёрнинг меҳнатига ҳам арзимайди.

Ҳар доим биз ҳақимизда «санъат ўлди, кинолар ёмон, ўқиганлар ҳам, ўқимаганлар ҳам рол ўйнаб ётибди», деган фикрлар юради, бу фикрларнинг ҳаммасига тепадаги инсонлар айбдор. Чунки улар кам пул тикади, кам пул ажратишади, улар ажратган пулга битта профессионал актрисани ўйнатгандан кўра, пул бермасдан, текинга бутун бошли фильмда суратга тушишга рози бўладиган жамоани ўйнатгани яхши.

Ўзини ҳурмат қилган одам арзимаган пулга рол ўйнамайди. Эрталабдан кечгача сиз ўша рол билан овора бўласиз. Овқатланасиз, машинангизга бензин қуйишингиз керак, кийинишингиз керак, хуллас, харажатлари жуда кўп.

Ҳозир битта клипда кийган кийимингизни бошқа клипда ҳам кийсангиз, одамлар дарров гап қилишади. Арзимаган пул беришгандан кейин битта кийимни ҳамма съёмкада кийишга мажбур бўласиз-да. Хуллас, бу ҳолатларни Matiz’га пул тўлаб, Malibu кутиш билан қиёслаш мумкин.

Санъатдан кўнглим қолишига сабаб бўлаётган жиҳатларидан яна бири — съёмкаларда учта одам ўтирса, шу даврада бўлмаган инсон ҳақида ғийбат бошланади. Агар сиз ўша даврадан турсангиз, сиз ҳақингизда ҳам гапириб бошлашади. Ким билан юраётган экан, машинасини ким олиб берибди, деган гаплар болалаб кетади. Шундай уйдирма гаплардан кимга нима наф, деб қоламан баъзида.

Ҳар битта нарсамни, қўлимдаги телефонимгача пешона теримга, ўзимнинг пулимга сотиб олганман. Тўрт йилдан буён қанча клип, сериал, кинода рол ижро этдим. Неча марталаб Instagram’да ўйинлар қилдим. Имконим борича уйга пул олиб киришга ҳам ҳаракат қиламан. Яна бу ишларни ўзимнинг кундалик харажатларимдан орттириб бажарганман. Кундалик харажатларим учун ҳам жуда кўп пул сарфлайман.

Ёки ким биландир юрганимни, кимдандир қиммат совға олганимни эшитмагансизлар-ку. Ҳар бир қиммат буюмимни ўз пулимга олганимни биладиган гувоҳларим ҳам бор.

Дурдона Қурбонова, актриса, блогер