Кинотавсия: болалар билан томоша қилиш керак бўлган, бошқаларга ўхшамайдиган одамлар ҳақидаги фильмлар (фото)

Биз инклюзив бўлишни ўрганаётган дунёда яшаяпмиз. Болаларни бундай ҳолатга тайёрлаш жуда муҳим, улар бошқаларга ўхшамайдиган одамлар билан учрашганда, кимга дуч келаётганини ва қандай жавоб беришни тушунишлари керак. Қийин, аммо муҳим мавзу ҳақида гаплашиш учун қуйидаги фильмлардан бирини биргаликда томоша қилиш ёрдам беради.

«Мўъжиза», 2017

Камдан кам учрайдиган генетик хатолик туфайли Августнинг юзи деярли йўқ. Ўзини Огги деб атайдиган бу болакай туғилганидан бери 27 та операцияни бошдан ўтказган, аммо барибир унинг ташқи кўриниши тенгдошлариникидан жуда фарқ қилади. У меҳрибон ва ғамхўр оилада, ажойиб доно ота-онаси ва жасур опаси билан ўсган. Аммо энди Огги очиқ «космос» — мактабга чиқиши керак. «Худойим, уни хафа қилмасалар эди», деб пичирлайди дуо қилаётган она (Жулия Робертс). Лекин уни ранжитишади. У мактаб коридорлари бўйлаб юрганида болалар ўзларини четга олишади ва ундан узоқроқда туришади. Баъзилар унинг ақлий қобилияти ҳам ташқи кўринишидек бўлса керак деб ўйлайди.

Бир куни мўъжиза содир бўлади ва Огги ўзига дўст топади. Аммо тенгдошларининг босими остида янги ўртоқ Августга бўлган муносабатини ўзгартиради. Энди бола, унинг оиласи, синфдошлари олдида узун ва машаққатли йўл бор — тушуниш, ҳамдард бўлиш ва қабул қилиш йўли.

«Иқтидорли», 2017 йил

Ҳар қандай жамиятда бўлгани каби болаларда ҳам қоидалардан ташқарига чиқиш ҳолатлари кузатилади. Ва кўпинча бошқаларга ўхшамайдиганлар масхара қилинади. Буни ноёб математик истеъдод билан туғилган кичкина Мерининг онаси яхши тушунарди. Аммо у вафот этгач, Мери тоғаси (Крис Эванс) қарамоғида қолади. У қизга ўзи билган ҳамма нарсани ўргатади, одамларга қўшилиши учун Мерини мактабга юборишга қарор қилади.

Бошланғич синф ўқитувчиси тезда унинг ажойиб истеъдодини кашф этади. Мактаб Мерини иқтидорли болалар академиясига юборишни таклиф қилади, аммо бу Фрэнк ва Мери катта муаммога дуч келиши билан баравар эди. Ахир Фрэнк синглисига Мерининг бошқа болалар каби оддий ҳаёт кечиради, деб ваъда берганди. «Ҳеч ким ақллиларни ёқтирмайди», дейди бир куни Мери.

Бу орада шуҳратпараст буви набирасининг иқтидорини билиб қолади. У ва Фрэнк ўртасида ҳақиқий қарама-қаршилик бошланади: тоғасига бувиси уни болалигидан маҳрум қилмоқчидек туюлади. Бувиси эса тоғаси Мерининг келажагини барбод қиляпти, деб ҳисоблайди.

«Форрест Гамп», 1994

Бу ақли заиф, аммо меҳрибон ва очиқкўнгил боланинг ҳаёти ва улғайиши ҳақидаги ажойиб ҳикоя. юқори ИҚ’га эга бўлишдан кўра яхши инсон бўлиш муҳимлиги ҳақидаги фильм.

Ҳаёт Форрестга (Том Хенкс) меҳрибон эди, чунки у ҳам атрофдагилардан меҳрини аямасди. Форрест ажойиб спортчи, фронт қаҳрамони, миллионерга айланади. Аммо унинг асосий бойлиги доимо одамлар бўлиб қолаверади. Аслида бошқалар унга ғамхўрлик қилишлари керак, лекин Форрест ҳар доим уларни ҳимоя қилади, қутқаради ва илҳомлантиради. Ахир ҳаёт шоколад қутисига ўхшайди: қандай начинкали шоколад чиқишини ҳеч қачон билмайсиз.

«Какку уяси узра парвоз», 1975

Рендл Патрик Макмерфи (Жек Николсон) қамоққа тушмаслик учун ўзини ақлдан озгандек кўрсатиб, бундан ҳам ёмонроқ жой — ҳамшира Милдред Ратчед томонидан шафқатсизларча бошқариладиган руҳий касаллар муассасасига тушиб қолади. Макмерфи клиниканинг қолган беморлари бундай даволанишга қарши эмаслигидан ҳайрат қолади ва исён кўтаради.

Фильм сўзсиз қудрат руҳий касалликдан кўра кўпроқ таъсир қилиши ва ақлдан оздириши ҳақида — «оддий» одамлар руҳий касалларга қараганда анча қўрқинчли ва хавфлироқ бўлиши мумкин.

«Стивен Хокинг олами», 2014

Кучли ақл ва темир ирода касалликни енга оладими? Стивен Хокингнинг бутун ҳаёти бу саволга жавоб беради. Ёш физик талаба олдида буюк кашфиётларга тўла ҳаёт турарди. Аммо даҳшатли ташхис ҳамма нарсага чек қўйиши мумкин.

Фильм одамларнинг ақли ва қалбини билмасдан туриб, уларнинг ташқи кўриниши ва жисмоний имкониятларига қараб баҳо бермаслик кераклиги, ҳақиқий севги ва буюк мақсадлар мўъжизалар яратиши ҳақида.

«Инсоннинг жасоратида чегара бўлмаслиги керак. Ҳаёт қанчалик даҳшатли кўринмасин, у бор экан, умид бор. Буюк олимнинг бу ибораси муаммоларга дуч келган ҳар бир кишига далда беради.

«1+1», 2011

Бахтсиз ҳодиса натижасида ногиронлар аравачасига михланиб қолган бадавлат аристократ Филип энди ҳеч нарсадан хурсанд бўлолмайди.

Аммо қашшоқликда яшовчи, яқинда қамоқдан чиққан ёш француз Дрис унинг ёрдамчиси бўлганда ҳаммаси ўзгаради. Бу иккиси бутунлай бошқа-бошқа дунё ва ҳар бири ўз стереотиплардан воз кечиши керак. Бу улар бир-бирига ёрдам беришнинг ягона йўли.

Дрис Филиппга яна ҳаётнинг таъмини ҳис қилишга ёрдам беради, чунки у Филиппда ногирон эмас, балки яхши инсонни кўради. Бу барча ёшдаги болалар билан суҳбатлашиш учун фойдали бўлган муҳим тажрибадир.