Европада хавфсизликни қайта конфигурациялаш Европа Иттифоқидан ўзини ўзи ҳимоя қилиш бўйича янада кўпроқ саъй-ҳаракатларни, жумладан, ягона Европа армиясини яратишни талаб қилади. Бу ҳақда Евроиттифоқнинг ташқи ишлар ва хавфсизлик сиёсати бўйича олий вакили Жозеп Боррел баёнот берди.
Унинг таъкидлашича, Россиянинг Украинадаги ҳарбий ҳаракатлари туфайли «Европа хавфсизлик ландшафти»да «тектоник силжиш» юз берган. Европа Иттифоқи тез ва кучли жавоб қайтариб Украинага молиявий, гуманитар ва ҳарбий ёрдам кўрсатди, бироқ «ҳозир Европанинг ўзи хавф остида экани аён бўлди», деб огоҳлантиради Боррел.
«Янги хавфсизлик муҳити Европа Иттифоқи ўз хавфсизлиги учун кўпроқ масъулиятни зиммасига олиши кераклигини кўрсатади. Бунинг учун бизга замонавий ва мувофиқ Европа қуролли кучлари зарур», — дейди Европа дипломатиясининг раҳбари.
Унинг қўшимча қилишича, Украинага ҳарбий ёрдам кўрсатиш Европа Иттифоқи захираларини тугатиб қўйган, Боррел буни «заиф томонларимизнинг энг ёрқин мисоли» деб атади.
Ягона Европа армиясини яратиш ғояси 2000 йилларнинг бошидан бери муҳокама қилинмоқда, Европа Иттифоқига аъзо давлатлар раҳбарлари турли вақтларда бу ҳақда гапиришган. 2018 йилда Франция президенти Эммануэль Макрон Европа Иттифоқи «ҳақиқий Европа армияси»га эга бўлишга қарор қилмаса, ўзини ҳимоя қилмаслигини таъкидлаган эди. Бундай эҳтиёжнинг сабабларидан бири сифатида у Россиянинг «таҳдидли» хатти-ҳаракатларини келтирган. Макрон, шунингдек, хавфсизлик ва ўзини ҳимоя қилиш қобилияти масаласида Европа Иттифоқи АҚШдан мустақилроқ бўлиши кераклигини айтган.
2021 йил сентябрида Боррел Афғонистондан Америка қўшинлари олиб чиқиб кетилганидан кейин у ердаги вазият муносабати билан иттифоқни ҳимоя қилиш учун ягона Европа кучларини яратиш зарурлигини айтиб ўтган.
22 май куни Коллектив хавфсизлик шартномаси ташкилоти бош котиби Станислав Зас ҳам Европа қитъасида кучайиб бораётган кескинлик ҳақида гапирди. «Беларусь 1» телеканалига берган интервьюсида у ташкилот НАТОнинг кенгайишини «минтақадаги кескинликни кучайтириш ва янада ҳарбийлаштиришнинг зарурий шарти» деб билишини айтди.
Шу билан бирга, Зас КХШТ эҳтимолий таҳдидларга жавоб бериш учун етарли куч ва воситаларга эга эканини ҳамда блокни кенгайтиришга ҳожат йўқлигини таъкидлади.
Изоҳ (0)