Коррупцияга қарши курашиш агентлигига келиб тушган мурожаат асосида Бухоро муҳандислик-технология институтида коррупцияни келтириб чиқараётган омиллар, унга сабаб бўлаётган шарт-шароитлар, маблағлардан фойдаланиш ва давлат харидларини амалга оширишда қонунчиликка риоя этилиши аҳволи ўрганилди. Бу ҳақда агентлик матбуот хизмати хабар берди.
Ўрганишда институтнинг молиявий ҳужжатлари қонунчиликка зидлиги, тўловлар тўғри ҳисобланмаслиги, бюджет ва бюджетдан ташқари маблағларнинг ноқонуний сарфланиши, иш ҳақи, стипендия ва бошқа тўловларнинг нотўғри тўлангани ҳамда давлат харидлари ва меҳнат қонунчилиги талабларига риоя қилинмаётгани каби қатор қонунбузилиши ҳолатлари аниқланган.
Хусусан, давлат харидлари бўйича институтнинг 2-корпуси фасад қисмини капитал таъмирлаш бўйича эълон берилмасдан, танловларсиз 1,4 миллиард сўмлик қурилиш ишлари тўғридан-тўғри «Fast Quality Building» МЧЖга шартномасиз бериб юборилган. Ушбу ташкилот Соғломлаштириш марказида 303,9 миллион сўмлик ноқонуний қурилиш ишларини амалга оширган.
Шунингдек, институт 1-биносининг 5-қаватида «Вобкент Сан-тех стоп монтаж сервис » МЧЖ томонидан амалга оширилган 2,4 миллиард сўмлик қурилиш ишлари якунланган. Бироқ тугалланган ишлар комиссия томонидан қабул қилинмаган ва унинг кафолат муддати тугамаган бўлсада, пудратчига 91,5 миллион сўм маблағ олдиндан тўлаб берилган.
Маблағларнинг ортиқча сарфланиши бўйича:
- Масъуллар томонидан 18 нафар магистрант ва 7 нафар талабанинг имтиҳонда олган «4» баҳолари қайдномаларга кўчирилишида «5» баҳога ўзгартирилгани натижасида 14,7 миллион сўмдан зиёд стипендиялар ортиқча тўлангани аниқланган;
- Ассистент-ўқитувчиларга 71 та ҳолатда катта ўқитувчи лавозимига белгиланган жами 50,5 миллион сўмлик ортиқча иш ҳақи тўланган.
0,50 ҳисса ташқи ўриндошлик асосида ишловчи кафедра профессори Х.Камилова текширув кунига қадар ишга келмаган бўлсада, унга январь ойида 4,3 миллион сўмлик иш ҳақи ҳисобланиб, мажбурий ушланмалар сақланган ҳолда 3,7 миллион сўм тўлаб берилган. Шунингдек, 0,50 ҳисса профессор лавозимида ишловчи Р.Гуляев ўқув йили юклама жадвалида қайд этилмаган бўлса ҳам, унга табел тўлдирилиб, 2021 йил сентябрь ойидан 2022 йил февраль ойига қадар 18,3 миллион сўм иш ҳақи ҳисобланган, мажбурий сақланмалар ушлангандан сўнг 15,9 миллион сўм иш ҳақи тўланган.
Ташқи ўриндошлик асосида ишловчи сиртқи бўлим услубчиси Умида Шарипова ҳамда Тошкент тўқимачилик ва енгил саноат институти ходими Анвар Жўраевларнинг асосий иш жойидан маълумотнома олинмаган. Дилором Эргашева бандликка кўмаклашиш маркази йўлланмасисиз диспетчер лавозимига қабул қилинган. Доцент лавозимига ишловчи Институтнинг академик лицейи директори Эминжон Ҳалимов асосий иш жойида 126,6 соат ишда бўлмаган.
Қариндош-уруғчилик алоқалари борасида манфаатлар тўқнашувига йўл қўйилгани бўйича:
- «Машинасозлик технологияси» кафедраси мудири Насрулло Ўриновнинг қўл остида унинг турмуш ўртоғи Муҳаббат Саидова катта ўқитувчи, акаси Абдулло Ўриновнинг ўғли Уйғун Ўринов доцент лавозимида, шунингдек, «Менежмент» кафедраси мудири Шербек Хайитовнинг қўл остида турмуш ўртоғи Шаҳло Примова ва синглиси Ирода Хайитовалар ўқитувчи-стажёр лавозимида ишлаётганлиги маълум бўлган;
- Бундан ташқари, институтдаги 34 нафар тюторларнинг 20 нафари ёшлар билан ишлашда етарли тажриба орттирмаган ҳамда етарли педагогик стажга эга эмас. 29 нафар ходим катта ўқитувчи лавозимига ноқонуний қабул қилинган.
- Давлат тест марказининг хулосасига кўра, 67 нафар абитуриентнинг табақалаштирилган тўлов-контрактлари миқдори буйруқларда белгиланмаган;
- Ўрганишда қўшма таълим дастурлари асосида таълим йўналишларига қабул қилинган 19 нафар абитуриентнинг иккинчи босқич бўйича тест синовларида иштирок этишлари учун танлаган таълим йўналишлари ва ўқишга қабул қилишда буйруқ билан белгиланган таълим йўналишлари бир-бирига мос келмаслиги аниқланган.
- Шунингдек, «Бухгалтерия ҳисоби ва аудит (тармоқлар бўйича)» таълим йўналиши бўйича тест синовида иштирок этган 5 нафар абитуриент «Дастурий инжиниринг» таълим йўналишига ўқишга қабул қилинган. Мисол учун, «Биотиббиёт муҳандислиги» таълим йўналиши бўйича тест синовида иштирок этган абитуриент Ҳайитбек Асроров «Дастурий инжиниринг» таълим йўналишига ўқишга қабул қилинган.
Қайд этилган қонун бузилиши ҳолатларининг келиб чиқишига Бухоро муҳандислик-технология институти раҳбарияти ва масъул ходимлари томонидан таълим, меҳнат, бюджет интизоми ва давлат харидларига оид қонун ҳужжатлари ва соҳавий норматив-ҳуқуқий ҳужжатлар ижроси таъминланмагани ҳамда етарли назорат ўрнатилмагани сабаб бўлган.
Баён этилганларга кўра, Ўзбекистон президентининг «Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида»ги фармонининг 4-бандига асосан Олий ва ўрта махсус таълим вазирлигига Коррупцияни келтириб чиқарувчи сабаб ва шарт-шароитларни бартараф этиш чораларини кўриш тўғрисида тақдимнома киритилган.
Аввалроқ Тошкентда 32 та уй-жой ширкати жами 3,5 млрд сўмни мақсадсиз сарфлаган ёки талон-торож қилгани тўғрисида хабар берилганди.
Изоҳ (0)