Термиз тумани «Дўстлик» маҳалласида яшовчи Улкан Эралиев боғни суғориш чоғида ердан сариқ металл парчасини топиб, Термиз археология музейига мурожаат қилди, деб хабар беради Туризм ва маданий мерос вазирлиги.
Маълум қилинишича, музей ва вилоят маданий мерос бошқармаси ходимларидан иборат гуруҳ топилма аниқланган жойга бориб, қазилма майдонини дастлабки иш жараёнини олиб борган. Қорахонийлар ва Салжуқийлар даврига оид кулолчилик буюмлари парчалари топилган.
Улкан Эралиев қимматбаҳо топилмани белгиланган тартибда Термиз археология музейига топширган, шундан сўнг унга амалдаги қоидаларда белгиланган ҳақ тўлаб берилган.
Музей директори бошчилигидаги музей мутахассислари ва нумизматлари томонидан қимматбаҳо топилма дастлабки экспертизадан ўтказилган.
«Олтин динорнинг олд томонида музей нумизмати докторанти Мансур Нормўминов «Аллоҳ» ва «Муҳаммад» сўзларини, шунингдек, араб алифбосининг айрим ҳарфларини ўқишга муваффақ бўлган. Танганинг орқа томонидаги матн деярли ўчиб кетган. Шикастланган, лекин яхши сақланиб қолган танга — олтин динорнинг оғирлиги 1,92 граммни ташкил қилади.
Маълумот учун, Термиз ўзининг стратегик жойлашуви туфайли империялар ўртасида тез-тез тортишувлар ва урушлар объектига айланган. Х асрнинг 2-ярмида шаҳар Қорахонийлар ва Ғазнавийлар ўртасидаги қонли тўқнашувлар жойи бўлган. Бу ҳукмдорлар бир-бирлари билан бўлган урушда аллақачон қаттиқ ҳолдан тойганидан фойдаланган Салжуқий шаҳзодалар Тўғрулбек ва Чағрилбек Термиз ва унинг атрофини эгаллаб олган.
Таъкидланишича, бу йил Термиз археология музейи очилганига 20 йил тўлди ва ўтган шунча вақт давомида ушбу музейда бирорта ҳам тилла танга бўлмаган.
Аввалроқ Сурхондарёдан топилган мис тангалар Мирзо Улуғбек даврига тегишли экани тасдиқланганди.
Изоҳ (0)